Ishte pjesë e Kombëtares kuqezi në Francë 2016 dhe do jetë sërish për në Gjermani 2024. Arlind Ajeti ka rrëfyer për "Kohën" në Kosovë se e mësoi ftesën e Sylvinhos nga ekrani.

"Shpresat gjithmonë kanë qenë që të jem pjesë e listës, por vendimet e trajnerit nuk i kemi ditur deri në momentin e konferencës, kur edhe u publikuan emrat. Kam përjetuar emocion të veçantë kur pashë në listë edhe emrin tim. Gjithmonë është e veçantë kur të thërret kombëtarja.

I kam përjetuar njëherë emocionet e finaleve të Europianit në Francë, do të jetë kënaqësi t’i provoj sërish kësaj vere. Kur t’i afrohemi ndeshjes së parë do t’i ndiejmë emocionet edhe më shumë", tha fillimisht Ajeti.

 

Më pas mbrojtësi që luan me Cluj në Rumani tha se tifozët janë mbështetja e tyre më e madhe.

"Për mua, por edhe për çdo lojtar, sigurisht që është shumë e rëndësishme paraqitja në Evropian. Është ëndërr për çdo lojtar. Është diçka shumë speciale për mua, por edhe për çdo lojtar tjetër. Besoj se emocionet e vërteta do t’i përjetojmë në momentin kur edhe do të fillojë ngjarja madhore.

Mundësitë i kemi, edhe pse është grup shumë i vështirë. Besoj se kemi mundësi të bëjmë diçka të madhe. Nuk besoj se do ta kemi të lehtë, por përkrahja e shqiptarëve do të jetë motiv shumë i madh për ne”, tha Ajeti.

Qendërmbrojtësi 30-vjeçar këtë sezon ka luajtur 25 ndeshje dhe ka shënuar tre gola, ndërsa për Kombëtaren ka mbajtur veshur fanellën në 23 raste, duke shënuar edhe një gol.