Armando Sadiku flet për të ardhmen: Të përsërisim historinë e 2016, e prisja ftesën

 

Kombëtarja shqiptare e futbollit luan me Moldavinë dhe Ishujt Faroe për Euro 2024. Për mediet ka folur edhe Armando Sadiku, sulmuesi që rikthehet në ekip pas tre vitesh.

“E prisja se trajneri do të më thërriste, sepse që kur u emërua më ka marrë në telefon dhe kemi komunikuar. Kur më ka ardhur ftesa kam qenë shumë i gëzuar. Pashë djem të ri, disa i njoh dhe është krijuar një grup shumë i mirë. Kualiteti është shumë i madh, jemi të gjithë bashkë këtu për një qëllim", tha sulmuesi.

LEXO EDHE:
Bllokimi i aksioneve dhe dalja në ankand, KF Tirana: Dezinformim i qëllimshëm, synon tjetërsimin e aseteve të klubit

Më pas Sadiku foli edhe për të ardhmen, duke thënë se Cartagena i ka ofruar edhe një tjetër vit kontratë.

"Është e vërtetë që te Cartagena kisha një vit kontratë, ditët e fundit ata më ofruan një vit tjetër kontratë dhe i kërkova pak kohë për shkak se isha me kombëtaren. Kur të mbaroj ndeshjet me Shqipërinë do t’i jap një përgjigje ekipit tim. Kemi shumë kualitet vetëm të shikosh se ku luajnë mesfushorët e kombëtares sepse nuk i kemi pasur ndonjëherë. Ne sulmuesit duhet të jemi shumë të vëmendshëm dhe të shënojmë gola nga topat e tyre. Moldavia do të rrijë në mbrojtje dhe ne kemi shumë besim te mesfusha që do të na furnizojnë me topa. Jam shumë i bindur se historia e 2016 mund të përsëritet", vijoi Sadiku.

 Elbasanasi ceku edhe kundërshtarët, duke thënë se nuk ka ekipe të dobëta.

"Grupi na e lejon edhe pse nuk ka ekipe të dobëta, kemi shumë besim dhe ta nisim me këmbën e mbarë në ndeshjen e parë në shtëpi. Shpresoj të jem sërish protagonist si në europianin në Francë. Jam shumë i lumtur dhe disa ditë pas emërimit të trajnerit ai më ka telefonuar se jam një lojtar shumë i rëndësishëm për kombëtaren", tha Sadiku.

 Sulmuesi tregoi se tifozët janë një mbështetje e madhe për kuqezinjtë.

"Është shumë e vërtetë që ne pa tifozët nuk do të kishim shkuar në europian. Ata na prisnin gjithmonë pas ndeshjeve që kishim jashtë Shqipërie. I bëj thirrje të gjithë tifozëve të na mbështesin në këto ndeshje sepse ne do t’ia shpërblejmë në fushë. Konkurrenca në kombëtare është e madhe dhe mundohesh të mos gabosh. Ajo është zgjedhje e trajnerit dhe ne duhet të jemi gjithmonë të gatshëm”, tha Sadiku.

Lajmi kryesor:

Kombëtarja/ Kualifikueset e Evropianit, Armando Sadiku: Përsërisim suksesin e 2016, e prisja ftesën! Bajrami: E kalova dëmtimin

S.DH/Shqiptarja.com

TAG:
• Kombetarja shqiptare
• Armando Sadiku
• adrian bajrami
• fshf
• euro 2024