Dita e Pavarësisë ndryshe nga çdo vit tjetër, këtë herë në Kosovë, është pritur me protesta. Opozita e Kosovës, mbajti mesditën e kësaj të shtune, një manifestim madhështor në sheshin “Zahir Pajaziti”.
Surprizë e këtij manifestimi ishte pjesëmarrja e ish-liderit të Lëvizjes Vetëvendosje, Albin Kurti, pavarësisht se ndaj tij kishte një urdhër-arrest nga Gjykata Themelore e Prishtinës pas veprimeve të dhunshme në Kuvendin e Kosovës. Por mesa duket, asgjë nuk e ka ndalur Albin Kurtin të thotë fjalën e tij të fundit, para se të arrestohej në Ditën e Flamurit në selinë e Vetëvendosjes, vetëm pak minuta pas përfundimit të manifestimit.
E teksa gjithçka u duk se përfundoi qetësisht, qindra efektivë të forcave speciale të Kosovës, rrethuan godinën e Vetëvendosjes, pak minuta pasi Albin Kurti sëbashku me deputetë dhe aktivistë të kësaj partie, kishin mbërritur në selinë e tyre. U deshën pak momente, që policia të ndërhynte me forcë brenda selisë, për të arrestuar ish-liderin e Vetëvendosjes.
Pas Kurtit, në pranga janë vënë edhe dhjetra aktivistë të Vetëvendosjes si dhe disa deputetë, pasi sipas policisë, ata përveçse kanë penguar aksionin policor, kanë ushtruar edhe dhunë ndaj efektivëve, duke lënë të plagosur 2 policë.
Sipas Policisë së Kosovës, janë shoqëruar 87 aktivistë të VV-së, por kjo e fundit deklaron se janë mbi 90 të arrestuar.
Arrestimi i Albin Kurtit dhe aktivistëve të Vetëvendosjes, është pritur me kritika të ashpra nga deputetët e kësaj partie, të cilët janë shprehur të vendosur për të vazhduar betejën e tyre në kundërshtimin e marrëveshjes së asociacionit të komunave serbe dhe demarkacionit me Malin e Zi. Pas arrestimit, mediat kosovare raportuan se Kurti eshte derguar me autoblinda te policise per ne Pallatin e Drejtesise.
Fotot të publikuara nga Vetëvendosje, dhuna policore ndaj aktivistëve të saj)
Sa persona ishin në manifestim? Policia dhe Vetëvendosja kanë dhënë shifra të ndryshme sa i takon pjesëmarrjes në “manifestimin për Republikën”. Sipas policisë ishin të pranishëm 5 mijë persona, ndërsa Vetëvendosja thotë se ishin 35 mijë.
*Foto e publikuar nga Vetevendosja
Shpend Ahmeti goditet me shkop gome Dhunës së policisë nuk i ka shpëtuar as kreu i Komunës së Prishtinës, Shpend Ahmeti. Në momentin që po ndërhynin në selinë e VV-së, Ahmeti është qëlluar me shkop gome.
Ora 18.55 Prokuroria kerkon 30 dite paraburgim per Albin Kurtin Sipas mediave kosovare, Prokuroria e Kosovës ka kërkuar 30 ditë paraburgim për deputetin Albin Kurti. Deputeti i VV-së pas arrestimit, ndodhet në Prokurorinë Themelore në Pallatin e Drejtësisë. Kurti akuzohet për tri vepra penale, “Pengim i personit zyrtar në kryerjen e detyrës zyrtare”, “mbajtje të armëve” dhe “shkaktimi i rrezikut të përgjithshëm”.
Ora 18.15 Surroi: Pushtetet që dajakun e shndërruan në argument, dështuan gjithmonë Ngjarjet e së shtunës në Prishtinë, ku u arrestua ish-lideri i Lëvizjes se Vetëvendosjes Albin Kurti dhe rreth 90 aktivistë të kësaj partie, janë komentuar edhe nga publicisti veton Surroi, sipas të cilit, kushdo që ka provuar këtë mënyrë të regjimit, ka dështuar. “Pushtetit që arreston 90 opozitarë, dajaku i shndërrohet në argument madhor e prangat në mjet debati. Kështu provuan edhe të tjerët. Dështuan”, ka shkruar Surroi në Facebook.
Ora 18.05 Anullohet koncerti ne sheshin "Skenderbeu" Pas situatës së tensionuar në Kosovë, Komuna e Prishtinës ka anulluar koncertin që do të mbahej me rastin e Ditës së Pavarësisë në sheshin “Skëndërbeu”. “Komuna e Prishtinës me keqardhje njofton opinionin publik se pas terrorit të ushtruar ndaj aktivistëve, deputetëve dhe simpatizantëve të Lëvizjes VETËVENDOSJE nga shteti policor i Isa Mustafës dhe Hashim Thaçit, anulohet koncerti, i cili qe paraparë të mbahej sonte në sheshin “Skënderbeu,” thuhet në njoftimin e Komunës së Prishtinës.
Ora 17.42 Limaj: Nuk tëhiqemi nga beteja jonë, opozita më e fortë Kryetari i partisë Nisma për Kosovën, Fatmir Limaj teksa uroi fillimisht të gjithë shqiptarët për festën e pavarësisë tha se pas manifestimit madhështor dhe arrestimeve të Albin Kurtit, deputetëve dhe dhjetra aktivistëve, apozita është më e fortë në betejën që ka nisur. “Opozita sot është edhe më e fuqishme, mbas mbështetjes së qytetarëve dhe mbas kësaj dhune. Ne nuk jemi bashkuar për një kauzë partiake, por një kauzë për interes kombëtar. Deri sa të anulohen ato dy marrëveshje, ose të bëhet referendumi, ose zgjedhje të parakohshme ne nuk do të ndalemi,” u shpreh Limaj në një prononcim për Shqiptarja.com.
Limaj u shpreh se veprimet e fundit, tregojnë se në Kosovë po instalohet shteti policor. “I gjithë opinioni e ka parë manifestimin madhështor të opozitës. Sot ne edhe festuam dhe dërguam mesazh politik qeverisë, se qytetarët e Kosovës janë kundra atyre marrëveshjeve. Veprimet e mëpastajme tregojnë që në Kosovë, po instalohet një regjim policor. Ky mentalitet është shumë i njohur. Ne jemi në një shtet të lirë demokratik, por në një vend serioz duhet të tregohet interes për mosthellimin e krizës. Drejtuesit politik sot u tmerruan nga pjesëmarrja e qytetarëve në manifestim. Ata detyruan policinë të zbatojë urdhra politikë, për të provokuar dhunë. Unë falenderoj qytetarët të cilët nuk lejuan të bien pre e provokimeve,” u shpreh kreu i Nismës për Kosovën. Ora 17.30 Ismaili: Deputetet u arrestuan si terroriste Deputeti i Vetëvendosjes Finsnik Ismaili është shprehur në një prononcim për Shqiptarja.com se arrestimet janë kryer në mënyrën më brutale të mundshme, të ngjashme me arrestimet e terroristëve në Paris. “Aktivistët e vetëvendosjes po arrestohen si të ishin terroristë. Është e tmerrshme çka po ndodh,” u shpreh ai duke shtuar se janë qindra policë që mbajnë ende të rrethuar selinë, ndërsa aktivistët e VV-së nuk lejohen të futen brenda godinës. Sipas tij nga ndërhyrja e policisë kanë mbetur të plagosur mbi 20 aktivistë.
Ora 17.10 Dyrmishi: Arrestimet na japin te drejte ne kundershtimin tone Arrestimi i deputetit Albin Kurti, ish –lideri i Vetëvendosjes, na jep të drejtë në kundërshtimin tonë ndaj dy marrëveshje, asaj të asociacionit të komunave me shumicë serve dhe demarkacionit me Malin e Zi. Kështu është shprehur për Shqiptarja.com, Hysni Dyrmishi, anëtar i kryesisë së Vetëvendosjes, teksa shtoi se Kosova është kthyer në shtet policor.
“Nuk kishim indice për arrestimin, por duke e parë që Kosova është shndërruar në shtet policor, e pritshim. Pushteti është në gjendje të bëjë gjithçka që të pengojëe opozitën për moslejimin e dy marrëveshjvee, edhe pse ne thamë që manifestimi do jetë paqësor. Ja që një pushtet i tillë nuk lejon që edhe festën ma të madhe kombëtare ta bëjmë ashtu sic duhet. Veprime të tilla na japin të drejtë në kundërshtimin tonë, ndaj dy marrëveshjeve,” tha Dyrmishi.
Ora 16.55 Pas arrestimit te Kurtit, reagojne deputetet e VV-se Pas arrestimit të Albin Kurtit në selinë e Vetëvendosjes, kanë reaguar deputetët e kësaj partie. Deputeti Ilir Deda, përmes një statusi në Facebook thotë se arrestimi I Kurtit e thellon dhe më shumë krizën politike.
“Me polici e arrestime nuk zgjidhet kriza politike. Arrestimi i Albinit pa zgjidhje politike të problemit politik e thellon këtë krizë edhe më shumë. Një ditë do të ketë zgjidhje, shpresoj që nuk do të paguajmë çmim të madh”, ka shkruar Deda në Facebook.
Ndërsa deputeti Rexhep Selimi, nuk e ka quajtur provokim pjesëmarrjen e Albin Kurtit në manifestimin e sotëm të opozitës në shesh.“Kurti është qytetar i Kosovës. Manifestimi ka qenë për të gjithë, por nuk ka asnjë lloj provokimi që do të arsyetonte veprimin e policisë për hyrje me dhunë në zyrat e Vetëvendosjes”, ka thënë Selimi për KTV-në.
Ora 16:45 Policia: 87 të shoqëruar, aktivistë të VV-së na qëlluan me karrige e tavolina Policia ka dhënë versionin e saj zyrtar për arrestimin e Albin Kurtit dhe shoqërimin e 87 personave të tjerë aktivistë të kësaj force politike. Policia sqaron se pas dyshimit që Albin Kurti ndodhej në selinë e VV-së u vendos të ndërhyhej për të zbatuar urdhër-arrestin ndaj tij, por një grup personash kanë protestuar para godinës së partisë duke penguar efektivët të bëjnë detyrën. Disa nga të shoqëruarit - thotë Policia e Kosovës - janë pikërisht personat protestues që ndaluan policinë të vë në pranga Kurtin.
Por dhuna dhe pengimi në kryerjen e detyrës - sipas policisë - ka vijuar edhe ku efektivët kanë hyrë në godinë, aty ku janë arrestuar disa persona që kanë qëlluar me mjete të forta ndaj punonjësve të policisë. Nga kjo përplasje mbetën të plagosur dy policë dhe dy aktivistë të Vetëvendosjes. "Policia ka hasur në rezistencë të disa personave të dhunshëm të cilët kanë qenë brenda në objekt, e të cilët kanë hedhur mjete të ndryshme të forta drejt zyrtarëve policor, duke përfshirë shkopinj, karrige, tavolina, mjete të metalta dhe sprej, ku si pasojë e saj dy polic dhe dy persona tjerë kanë pësuar lëndime. Zyrtaret policor bazuar në situatën dhe veprimet e dhunshme të shfaqura nga personat brenda në objekt, kanë vepruar konform autorizimeve ligjore dhe kanë arrestuar disa persona të cilët janë shoqëruar në stacione policore për procedura të mëtutjeshme", thotë policia në njoftimin saj zyrtar.
Ora 14.45 Vetevendosje: Policia ka arrestuar mbi 90 aktiviste “Policia ka arrestuar dhunshëm dhjetëra aktivistë në zyrat e Lëvizjes Vetëvendosje. Policia ka arrestuar mbi 90 aktivistë deri më tash. Disa prej tyre janë të lënduar rëndë nga dhuna brutale policore. Dënojmë arrestimin e tyre të padrejtë dhe kërkojmë lirimin e tyre të menjëhershëm”, thuhet në njoftimin e radhës të Vetëvendosjes.
(Pamje nga arrestimi i Albin Kurtit në selinë e Vetëvendosje)
Ora 15.50 Policia hyn ne godinen e VV-se, disa te arrestuar Pas perleshjeve me aktivistet e Vetevendosjes te cilet rrethuan seline e VV-se, policia ka mundur te hyje brenda godines se Vetevendosjes. Por ende nuk dihet nese deputeti Albin Kurti ndodhet brenda ne seli. Sakaq, policia ka arrestuar disa persona qe ndodheshin brenda selise se VV-se. Situata vazhdon te jete kaotike dhe e tensionuar. Ne ambjentet e jashtme te godines se Vetevendosjes kane mberritur edhe disa ambulanca.
Ora 15.20 Rrethohet Vetevendosje, kerkohet arrestimi i Albin Kurtit Pak minuta pasi manifestimi paqësor i opozitës kosovare ka përfunduar, policia e Kosovës, ka rrethuar godinën e Lëvizjes Vetëvendosje, pasi kërkon arrestimin ish-liderit të saj Albin Kurti, raportojnë mediat kosovare.
Sakaq dhjetra aktivistë të Vetëvendosjes, që kanë rrethuar selinë e VV i kanë bërë thirrje policisë së Kosovës që të mos arrestojnë Albin Kurti, pasi në të kundërt do të përballen fizikisht me ta. Brenda pak minutash situata eshte tensionuar pasi aktivistet e Vetevendosjes jane perleshur me policine.
Deputeti i Vetëvendosjes Albin Kurti ishte i pranishëm gjatë protestës së mbajtur në sheshin “Zahir Pajaziti” ku edhe mbajti një fjalë para protestuesëve, e cila u prit me shumë ovacione.
Ndaj Kurtit është nxjerrë një flet-arrest pas veprimeve të dhunshme në Kuvendin e Kosovës. Policia e Kosovës, përmes një njoftimi zyrtar për media thotë se ka patur informacione lidhur me pjesëmarrjen e Kurtit në protestë, por nuk e ka arrestuar gjatë manifestimit me qëllim të moseskalimit të situatës.
(Efektivët e policisë rrethojnë rrugët për tek selia e Vetëvendosje)
