Arrestohet në flagrancë 59-vjeçari
Kërcënoi kreun e Bashkisë Korçë

KORÇE – Kryetari i Bashkisë së qytetit të Korçës Sotiraq Filo është kërcënuar në mënyrë të vazhdueshme nga një 59-vjeçar, i cili është vënë në prangat e policisë. Blutë e Korçës arrestuan në flagrancë gjatë ditës së djeshme, Petrit Xhelollarin pas kallëzimit që bëri kryetari i Bashkisë së këtij qyteti.
 
Burime nga policia e Korçës thanë për “A1 Report” se 59-vjeçari e ka kërcënuar gojarisht kryetarin e Bashkisë, ndërsa ky i fundit lëvizte në qytet.
 
Ky incident sipas policisë është përsëritur disa herë gjatë ditëve të fundit. Duke marrë shkas nga kjo situatë kryebashkiaku Filo ka kallëzuar se për shkak të detyrës është kërcënuar në mënyrë të vazhdueshme nga Petrit Xhelollari.
 
Ky i fundit ishte pronar i një shtëpie 3-katëshe në rrugën “Gjon Buzuku” e cila është planifikuar të prishet nga INUV në kuadër të rikonstruksionit të kësaj rruge.
 
Xhelollari ishte pakënaqur me vlerën e caktuar nga bashkia për shpronësimet, ndaj për këtë arsye kishte kërcënuar disa herë kryebashkiakun Filo.
 

(Në foto: Petrit Xhelollari)

Reagon Bashkia e Korçës: Projekti i rrugës do zbatohet
Ndërkohë Bashkia e Korcës nga ana e saj ka reaguar duke thënë se projekti i rikonstruksioni të rrugës “Gjon Buzuku” do të zbatohet. Ky institucion është i vendosur të respektojë ligjin deri në fund. Ndërsa për protestat e banorëve të cilëve u preken shtëpitë, Bashkia Korçë shpjegon se ajo po ndjek të gjitha procedurat dhe rrugët ligjore për miratimin e projektit dhe shpronësimin e banorëve.

PD Korçë: Denoncojmë terrorin policor ndaj qytetarit
Për këtë çështje ka reaguar edhe dega e Partisë Demokratike në Korçë. Duke denoncuar arrestimin e Xhelollarit, PD i ka bërë apel OSBE dhe organizmave ndërkombëtare të të drejtave të njeriut që të verifikojnë këtë ngjarje.
 
“Me akuzën e shantazhit karshi Filos, i janë vënë pranga një kryefamiljari që po i hidhet në erë mundi dhe djersa e emigracionit. Denoncojmë terrorin policor ndaj qytetarit dhe i OSBE-së dhe të gjitha organizatave të të drejtave të njeriut që të verifikojnë arrestimin e Petrit Demollarit”, thuhet në reagimin e PD të degës Korçë.

Redaksia Online
(Shqiptarja.com)

TAG:
• OSBE