Arrestohet për kultivim kanabisi 19-vjeçari në Bulqizë, pranë parcelës kishte fshehur edhe një armë gjahu

DIBËR- Një 19-vjeçar është arrestuar nga policia e Bulqizës, pasi dyshohet se ka kultivuar bimë narkotike në zonën e quajtur ‘Lugu i Menës’ në zonën pyjore në Fushë-Bulqizë. Ndërkohë pas kontrollit në vendin ku u gjet i kultivuar kanabisi, u gjet e fshehur dhe u sekuestrua një armë gjahu që 19-vjeçari e posedonte pa leje dhe 2 telefona celularë.

'Në vijim të punës për parandalimin, evidentimin dhe goditjen e veprimtarisë kriminale në fushën e kultivimit të bimëve narkotike, kapjen e personave në kërkim apo të atyre që mbajnë apo qarkullojnë me armë zjarri pa leje, shërbimet e Komisariatit të Policisë Bulqizë, në bashkëpunim me strukturat e DVP Dibër, si rezultat i kontrollit të territorit kanë evidentuar dhe goditur një rast të tentativës për kultivim të kanabisit në një zonë pyjore në Fushë-Bulqizë.

Në vijim të veprimeve, specialistët për Hetimin e Krimit në Komisariatin e Policisë Bulqizë, arrestuan në flagrancë shtetasin L. Xh., 19 vjeç,  banues në Bulqizë, pasi dyshohet se është  autori i kultivimit të disa bimëve narkotike në vendin e quajtur   'Lugu i Menës'.

LEXO EDHE:
VIDEO/ Grushta mes gjimnazistëve në Bulqizë, kampionati i volejbollit përfundon me rrahje masive! Policia i shoqëron në polici

Gjatë kontrollit të imtësishëm të vendit të ngjarjes u gjet e fshehur dhe u sekuestrua një armë gjahu që 19-vjeçari e posedonte pa leje dhe 2 telefona celularë.'- njofton policia.

M.Q./r.k./Shqiptarja.com

TAG:
• bulqizë
• Diber
• kultivim kanabisi