Nënkryetarja e Partisë së Lirisë, Erisa Xhixho, ka akuzuar qeverinë e kryeministrit Edi Rama për 'shpopullimin masiv të Shqipërisë'.

Përmes një postimi në rrjetet sociale, Xhixho shkruan se në një kohë kur vendi po përballet me një krizë të rëndë demografike, qeveria Rama mban 'asamble me propagandë boshe për suksese imagjinare'.

Duke publikuar edhe një studim të OKB-së ku thuhet se deri në vitin 2100 Shqipëra rrezikon të humbasë më shumë se gjysmën e popullsisë, Xhixho thekson se vendi ynë renditet i dyti në Evropë, pas Ukrainës, për rënien e parashikuar të popullsisë në të ardhmen.

Sipas Xhixhos, mungesa e meritokracisë, pagat e ulëta, çmimet e larta të banesave dhe pasiguria ekonomike po detyrojnë të rinjtë të emigrojnë dhe familjet të heqin dorë nga planet për të pasur fëmijë.

Ajo akuzon qeverinë se ka nxitur largimin e mbi një milion shqiptarëve dhe se modeli ekonomik favorizon kullat dhe përqendrimin e pasurisë, në vend të krijimit të mundësive për qytetarët. Xhixho e cilëson shpopullimin një emergjencë kombëtare dhe bën thirrje për bashkim kundër qeverisë.

Reagimi i Xhixhos:

Shpopullim masiv i Shqipërisë dhe qeveria mban asamble me propagandë boshe për suksese imagjinare.

Fakt është që Shqipëria renditet e dyta në Evropë për rënien e parashikuar të popullsisë.

Suksesi i vetëm i qeverisë së Edi Ramës sot është që Shqipëria renditet pas Ukrainës që është në luftë, për largim masiv të qytetarëve nga vendi. Pra, shqiptarëve që largohen nga vendi i tyre ua kalojnë vetëm ukrainasit që i ikin luftës.

Deri në vitin 2100 sipas OKB mund të humbasim shumë më tepër se gjysmën e popullsisë.

Të rinjtë largohen sepse nuk  ka meritokraci, nuk përballojnë dot çmimet e shtepive, pagat e ulëta dhe pasigurinë ekonomike. Familjet nuk lindin fëmijë sepse nuk ia dalim dot.

Edi Rama me qeverinë, me politikat e tyre të dështuara, i detyruan mbi 1 milion shqiptarë të lënë vendin e tyre.

Është kjo arsyeja pse të rinjtë protestojnë prej muajsh.

Kjo është pasoja e një modeli ekonomik që nuk krijon mundësi për qytetarët, por thellon pabarazinë dhe pasigurinë. Një modeli ekonomik që bazohet te kullat e ndërtuara me paratë e krimit e korrupsionit, ku nuk e gjen veten ai që punon me djersë.

Kjo qeveri që ka kriminalizuar çdo hallkë të shtetit, që ka rrënuar vendin, duhet largohet.

Ndaj patetizmat e Edi Ramës sot nuk mund të gënjejnë më askënd!

Jemi në kushtet e një emergjence kombëtare dhe vetëm bashkimi përballë kësaj organizate kriminale nuk është më një zgjedhje por një detyrim kombëtar dhe atdhetar ndaj vendit.


Lajmi kryesor:

'Rama, shah-mat me Ballukun', Bardhi pas Asamblesë së PS: E ka mbrojtur me kartona në Parlament, është peng i saj! Sado të përpiqet t'i lajë duart, s'mund ta fshehë përgjegjësinë e tij