Pas gati shtatë vitesh nga atentati në mbikalimin e Shkozetit, Gjykata e Posaçme ka dhënë vendimin për dy prej të akuzuarve kryesorë. Plaurent Dervishaj u dënua me burgim të përjetshëm si organizator i sulmit, ndërsa Julian Meçaj me 35 vite burg si bashkëpunëtor. Në atentatin e 1 nëntorit 2019 humbi jetën shoferi Andi Maloku, ndërsa mbetën të plagosur ish-prokurori Arjan Ndoja dhe Aleksandër Laho.

Dy të pandehurit u gjykuan në një proces të ndarë nga pjesa tjetër e personave të përfshirë në të njëjtën dosje. Mbi ta rëndonin akuzat për vrasje me paramendim dhe vrasje të mbetur në tentativë, të dyja si grup i strukturuar kriminal.

Për të njëjtën çështje vijon ende procesi gjyqësor ndaj Amar Shkëmbit dhe Bledar Polovinës. Ky i fundit ndodhet në arrati dhe po gjykohet në mungesë. Më herët, për atentatin e Shkozetit janë dënuar me vendim të formës së prerë edhe Redjan Rraja me burgim të përjetshëm, Ramazan Rraja me 9 vite burg, dënim i ulur në 6 vite për shkak të gjykimit të shkurtuar, si dhe Genti Ndërjaku, Bashkim Haxhia, Endrit Sinani dhe Julian Pjetri.

Gjatë procesit gjyqësor ka dëshmuar dy herë ish prokurori Arjan Ndoja, i cili ka deklaruar se motivet e atentatit janë të qarta për të, por se zbardhja e plotë e ngjarjes i takon organit të akuzës. Ai ka mohuar të ketë pasur njohje me Aleksandër Lahon, duke sqaruar se udhëtimi me të në automjet ditën e atentatit ishte rastësor.

Nga ana tjetër, Plaurent Dervishaj dhe Julian Meçaj kanë mohuar akuzat gjatë gjithë procesit gjyqësor. Të dy u arrestuan në Dubai dhe u ekstraduan në Shqipëri në gusht të vitit 2024 për t'u përballur me drejtësinë.

-------------------------------
Sqarim: Çdo person prezumohet i pafajshëm deri sa nuk vërtetohet fajësia e tij me vendim gjyqësor të formës së prerë