Mjeku shërbim privat në spitale shtetërore pas orarit të punës, nëse qytetari e kërkon! Doktori merr 70% të fitimit, 30% spitali

Operacionet në spitale do mund të bëhen edhe me robotë në vitin 2030. Kryeministri Edi Rama tha se po punohet së bashku me Ministrinë e Shëndetësisë për të sjellë shumë shpejt robotët në Shqipëri.

“Do vazhdojë ta pajisim me aparaturat më të fundit. Po punojmë me ministren për të sjellë robotë për operacionet që është një tjetër shkallë. Besoj shumë që kemi arsyet të ndihemi të inkurajuar dhe optimist, dhe pa diskutim që tani më shumë sesa dje, kur e thonim që shumë gjëra duheshin bërë për ta besuar, kemi shumë realitet për ta besuar plotësisht se Shqipëria e 2030 do jetë një vend me shërbim shëndetësor që do u krijojë shqiptarëve kushtet psikologjike të plotë për të mos shkuar jashtë, përveç rasteve kur ka nevojë për operacione të super specializuara”, tha Rama.

Pas Spitalit Rajonal “Memorial” në Fieri, edhe pesë spitale të tjera në vend kanë përfituar Kartën e Autonomisë Menaxheriale. Ministrja e Shëndetësisë dhe Mbrojtjes Sociale, Albana Koçiu u ka dorëzuar sot Qendrës Spitalore Universitare “Nënë Tereza”, Spitalit Rajonal Durrës, Spitalit Rajonal Shkodër, Spitalit Rajonal Lezhë dhe Spitalit Rajonal Vlorë, Kartën e Autonomisë Menaxheriale.

Gjatë konferencën ku ishte i pranishëm edhe kryeministri Edi Rama, Koçiu theksoi se pas 10 vitesh transformimi të pandërprerë në strukturat spitalore tshmë po synohet në objektiva shumë më ambiciozë siç është autonomia, e cila sjell modelin e menaxhimit europian në qendrat tona spitalore.

“Pas një procesi të gjatë, pesë qendra spitalore kanë përmbushur kriteret e Kartës së Autonomisë Menaxheriale. Nuk ka qenë aspak e lehtë, sepse për të ardhur deri këtu, QSUNT dhe Spitalet Rajonalë të Shkodrës, Lezhës, Durrësit dhe Vlorës kanë përgatitur objektiva të qarta zhvillimi, plane të detajuara pune, strategji të qartë të menaxhimit të burimeve njerëzore, protokolle, udhërrëfyes, indikatorë performance, etj”, u shpreh Koçiu.

Ajo u shpreh se me dorëzimin e Kartës së Autonomisë Menaxheriale, të gjithë këto qendra spitalore do mund të ofrojnë standarte më të larta për qytetarët, kushte dhe paga më të mira për mjekët dhe progres e modernizim të sektorit.

Ministrja nënvizoi se hap pas hapi, objektivi ynë është që deri në 2027 të kemi 17 qendra spitalore, pra 17 modele ekselence që do të vetmanaxhohen në të gjithë vendin.

“Autonomia është një mekanizëm i cili ka filluar të aplikohet prej më pak se një viti, gradualisht do të krijojë mundësinë që në sistemin tonë shëndetësor të ketë paga edhe më të larta për mjekët që sigurisht janë të lidhur me performancat e tyre.  Ky është një proces që do të thellojë më tej meritokracinë, duke krijuar mundësinë për mjekët dhe hapësira më të mëdhaja për të punuar dhe angazhuar brenda struktura të tyre shëndetësore.  Përfitimet shtesë që gjeneron autonomia spitalore, ecin paralel dhe nuk i mbivendosen programit tonë për rritjen e mëtejshme të pagave, program nga i cili pas rritjes më të madhe historike të ndodhur në 2023-shin, do të vijojë këtë vit me një rritje të mëtejshme për mjekët dhe infermierët”, deklaroi Koçiu.

Kryeministri Edi Rama premton rritje tjetër page për mjekët.

Ne jemi këtu për të bërë 100 fishin për të merituar besimin e njerëzve edhe besimin tuaj. Do të vijojmë ta bëjmë pa asnjë diskutim e as lëkundje. Nëse sot mjekët janë më në fund të mirëpaguar krahasimisht me atë ku ishin dua tu them mjekëve: S’keni parë gjë akoma as në aspektin e pagave. Nuk jemi ne absolutisht të lumtur dhe absolutisht nuk e kemi fjetur mendjen që këto tani janë pagat e mjekëve e tani hajde se folim nga viti 2040. Jo! Do të bëjmë çmos që të ardhurat e mjekëve e infermierëve dhe shërbëtorëve të shërbimit publik të vijnë duke u rritur.

Deklarata u bë gjatë aktivtetit për autonominë menaxheriale për QSUNT dhe 4 spitale Rajonale. 

Teksa renditi ndryshimet thelbësore të bëra në spitalet publike në vend, kryeministri Edi Rama mori shëmbullin e Qendrës Spitalore Nënë Tereza, duke e cilësuar si një ndër spitalet më të mira të Europës.

Mes të tjerash, ai përmendi faktin se 2 ditë më parë ministri i Jashtëm, Igli Hasani kishte bërë një operacion në spitalin e ri të sëmundjeve të Brendshme dhe kishte shprehur habinë për shërbimin e ofruar dhe ekspertizën duke i shkruar edhe një mesazh kreut të qeverisë.

“Vite më parë mjekësia ka qenë në gjendje të paimagjinueshme, këto pamje që kemi sot do ishin pjesë e një dëshire që dukej e pamundur të realizohej në një kohë relativisht të shkurtër, por sot jemi në një stad krejt tjetër. Mund ta konfirmoj edhe si pacient i QSUT. Jo më larg se pardje ministri i Jashtëm bëri një operacion në spitalin e ri të sëmundjeve të Brendshme dhe më shkruajti mesazh që nuk e besonte dot akoma se ky është spitali ynë në Tiranë. Sepse ai mori detyrën duke ardhur nga shërbimi diplomatik jashtë. Kështu dëshmojnë shumë njerëz që kanë kaluar nga ai spital, i cili është padyshim për nga kushtet dhe ekspertiza, ndër spitalet e mira të Europës”- tha Rama.