Autoritetet kosovare të shqetësuara
për emigrimin e paligjshëm drejt BE

Në Prishtinë, autoritetet vendase e ndërkombëtare thanë se duhet shtuar përpjekjet për të parandaluar rritjen e numrit të qytetarëve që synojnë migrimin e paligjshëm në vendet e Bashkimit Evropian.

Në një debat mbi këtë çështje të organizuar nga presidentja e Kosovës Atifete Jahjaga, zyrtarët evropian thanë se qytetarët e Kosovës nuk mund të fitojnë strehim në vendet e Bashkimit Evropian dhe ikja në rrugë të paligjshme përveç që mund t'i varfërojë ata, dëmton edhe procesin e liberalizimit të vizave.

“Si institucione të Kosovës e kemi për detyrë të marrim reforma të thella në fushën e sundimit të ligjit, si parakusht për tërheqjen e kapitalit të huaj dhe zhvillimin e përgjithshëm të tregut të lirë. Pavarësisht potencialit që Kosova mban, nuk ka investitorë që do të bindet të vijë në Kosovën e tensionuar politikisht, të ndarë etnikisht dhe të sfiduar nga mungesa e efikasitetit të sistemit të drejtësisë", deklaroi presidentja Jahjaga. 

Në këtë pikë kërkohet bashkëpunim më i madh i vendeve nëpër të cilat kalojnë kosovarët, siç janë Serbia dhe Hungaria. Kryeministri Isa Mustafa premtoi se do të nënshkruajë marrëveshje me vendet e BE-së për punë sezonale. 

Por sesa sfiduese është kjo situatë për qeverinë e re, këtë e tha shefi i zyrës së BE-së, Samuel Zhbogar. Ai bëri të ditur se kërkesat për azil shqyrtohen në baza individuale dhe gjasat janë që shumica të refuzohen. 


Redaksia Online
(Shqiptarja.com)