Avokati i Popullit zgjidhet anëtar i 2
bordeve ndërkombëtare për të drejtat

GJENEVE- Avokati i Popullit, Igli Totozani, u zgjodh sot në Kombet e Bashkuara në Gjenevë, anëtar i dy bordeve të rëndësishme, pjesë e sistemit që siguron koordinimin dhe bashkëpunimin e institucioneve kombëtare të të drejtave të njeriut me Zyrën e Komisioneres së Lartë të Organizatës së Kombeve të Bashkuara për të Drejtat e Njeriut: Bordit të Rrjetit Rajonal Europian dhe Bordit Drejtues të Komitetit Ndërkombëtar për Koordinimin e Institucioneve Kombëtare të të Drejtave të Njeriut (KNK).

Këto vendime u morën në ditën e dytë të Sesionit të 26 të KNK, në 7 maj 2013, e cila iu rezervua takimeve të katër grupeve të mëdha të rrjeteve rajonale të institucioneve kombëtare të të drejtave të njeriut: Rrjeti Afrikan, Rrjeti i Vendeve të Kontinentit Amerikan, Rrjeti i Azisë dhe Pacifikut, dhe Rrjeti Europian.

Rrjeti Rajonal Europian është i përbërë nga 40 anëtarë, përfshirë dhe institucionin e Avokatit të Popullit të Shqipërisë. Gjatë takimit të sotëm, u përzgjodhën me votim të fshehtë anëtarët e Bordit drejtues të këtij Rrjeti, i cili në tre vitet e ardhshme do të përbëhet nga 6 anëtarë: Igli Totozani dhe përfaqësuesit e Danimarkës, Francës, Gjermanisë, Skocisë dhe Gjeorgjisë. Rrjeti Rajonal Europian e kryen aktivitetin e tij në bashkëpunim të ngushtë me Këshillin e Europës, me struktura të tjera europiane, me OSBE/ODHIR, si dhe me strukturat e OKB-së. Rrjeti koordinon ndërhyrjet strategjike, që synojnë politika dhe litigime për të drejtat e njeriut në rajonin e Europës.

Nga 6 anëtarët e Bordit të Rrjetit Rajonal Europian, 4 prej tyre, përfshirë dhe Avokatin e Popullit, Totozani, u votuan për të përfaqësuar këtë Rrjet në Bordin Drejtues të Komitetit Ndërkombëtar për Koordinimin e Institucioneve Kombëtare të të Drejtave të Njeriut (KNK), bord i cili përbëhet nga 16 anëtarë.

Ky Komitet, aktualisht me 103 anëtarë nga vende të ndryshme të botës, është krijuar që në vitin 1993 për të koordinuar institucionet kombëtare të të drejtave të njeriut dhe për t'i nxitur ato të zbatojnë Parimet e Parisit. Në të njëjtën kohë nëpërmjet Nënkomitetit të tij për Akreditimin, KNK shqyrton dhe akrediton institucionet e të drejtave të njeriut në nivel kombëtar në raport më përmbushjen e Parimeve të Parisit.

Në maj të 2012, Avokati i Popullit është zgjedhur gjithashtu anëtar i Bordit Administrativ të Organizatës së Ombudsmanëve të vendeve të Mesdheut.

Redaksia Online
(e.s/shqiptarja.com)

TAG:
• OSBE