TIRANË- Deputeti i PD-së, Ervin Salianji dhe një nga protagonistët e çëshjtes "Babale" me anë të një statusi në Facebook është shprehur se producenti Rama ka dështuar në prodhimin e filmit njësoj si në qeverisje.

Në statusin e tij, Salianji ka ngritur dy pyetje: a e konfirmoi plotësisht laboratori shtetëror italian, laboratori më i mirë në botë sipas Ramës, që zëri eshtë i Xhafajt dhe pse nuk e nxjerr policia arrestimin e Alizotit?

Në fund Salianji, ka rikujtuar deklaratën e Xhafajt, i cili u shpreh se nëse ekspertiza provon që zëri është i vëllait do dorëhiqej.

Për kur e ruan dorëheqjen Xhafaj pasi ekspertiza e konfirmoi zërin dhe vetëm policia e drejtuar prej tij ka fabrikuar prova? 

Ervin Salianji, deputet

Disa ditë më parë Prokuroria e Krimeve të Rënda urdhëroi arrestimin e "Babales" dhe kunatit të tij Fredi Alizoti të cilët akuzohen për kallëzim të rremë. Ka qenë pikërisht kunati i Babales ai i cili ka imituar zërin e Agron Xhafajt, vëllait të ministrit të Brendshëm, Fatmir Xhafaj si i implikuar në një linjë trafiku kanabisi drejt Italisë. Ndërsa për gazetarin Jetmir Olldashi, Prokuroria vendosi detyrim paraqitje.

Masat e Prokurorisë së Krimeve të Rënda erdhën pas mbërritjes së përgjigjes së ekspertizës së audiopërgjimit nga një laborator në Britaninë e Madhe nga ku ka rezultuar se materiali është i montuar dhe nuk kemi të bëjmë me zërin autentik të Agron Xhafajt.  

Fredi Alizoti, kunati i Albert Veliut i quajtur ndryshe "Babale" ka pranuar në Prokurori se ka imituar zërin e Agron Xhafajt dhe për këtë shërbim ai sëbashku me 'Babalen' do paguheshin 200 mijë euro nga deputeti i PD, Ervin Salianji. 

Postimi i plotë i Salianjit:

Producenti Rama dështon në prodhimin e filmmit njësoj si në qeverisje.Dy pyetje presin përgjigje sot, a e konfirmoi plotësisht laboratori shtetëror italian, laboratori më i mirë në botë sipas Ramës, që zëri eshtë i Xhafajt? Pse nuk e nxjerr policia arrestimin e Alizotit? Ku e arrestoi? Ku e mban sot? Xhafaj tha që nëse ekspertiza provon që zëri është i vëllait do dorëhiqej, për kur e ruan dorëheqjen Xhafaj pasi ekspertiza e konfirmoi zërin dhe vetem policia e drejtuar prej tij ka fabrikuar prova?