Baku, Rona Nishliu mahnit
me zërin, mban sekret veshjen

BAKU- E vetme në skemë, me një vokal të fuqishëm dhe e rrethuar nga drita të kuqe, Rona Nishliu arriti të impresionojë të gjithë ata që e ndiqnin në provat e para të festivalit të Eurovizion që këtë vit zhvillohen në Baku të Azerbajxhanit.

Këngëtarja shqiptare nga Kosova dje pati provat e para si dhe konferencën e parë për shtyp para gazetarëve të shumtë nga e gjithë Europa.
Një performancë romantike në skenën e errët që ndriçohej nga drita të kuqe, të cilat sa vinin e shtoheshi. Performanca është statike, si për të mbështetur mesazhin që mbart kënga dhe për tu fokusuar në vokalin dhe orkestrimin e këngës.

“Intepretimi i këngës dramatike, në gjuhën shqipe, ishte tepër bindëse dhe profesionale, dhe përfundimisht Rona nuk ka nevojë për një vokal mbështetës.”- vlerësojnë gazetarët në shkrimin e publikuar në faqen zyrtare të eurovizion.

“Jam shumë e lumtur që prezantoj vendim tim me një këngë të cilën e dua shumë dhe që ka shumë domethënie për mua” – u shpjegon Nishliu gazetarëve.

Pyetjes së një gazetari se ajo një vajzë nga Kosova prezanton Shqipërinë dhe jo Kosovën në Festivalin Europian të Këngës Nishliu iu përgjigj se festivali i Tiranës ka qenë gjithmonë i hapur për kosovarët dhe se ishte e lumtur që kishte mundësinë të performonte në skenën e eurovizion. Veshja një element tepër i rëndësishëm për performancën mbetet sekret. “Do ta mësoni më 17 maj”- u ka thënë Rona Nishliu duke mbyllur konferencën për shtyp.

Në Baku për të mbështetur Rona Nishliun është dhe Florent Boshnjaku, autori i këngës. Prova e dytë do të jetë të enjten më 17 maj në orën 10:30. Pas secilës provë, Rona do të jetë edhe në një konference për shtyp përballë gazetarëve të atashuar pranë Eurovisionit. Për regjistrimin e këngës u punua në studiot e Ocean Ëay Recording dhe CapitolRecords në Los Anxheles, ndërsa përpunimi i këngës u bë në studion muzikore Sterling, në Nju-Jork.

Këngëtarja nga Kosova do të performojë në shqip gjatë natës së parë të festivalit, më 22 maj, së bashku me përfaqësuesit e Rumanisë, Greqisë, Rusisë, Belgjikës, Hungarisë etj. Këtë vit në Eurovizion do të konkurrojnë 37 këngë në dy netë gjysmëfinale, 22 dhe 24 maj, ndërsa finalja e madhe do të jetë mbrëmjen e 26 majit.
(sg/shqiptarja.com)