Vendimi i Kurtit krijoi radhë të gjata në kufi, Balla në Morinë takon Xhelal Sveçlën: Duhet zgjidhje, të mos vonohen mërgimtarët

Ministri i Brendshëm Taulant Balla ka shkuar vetë në Morinë për të kërkuar gjetjen e një zgjidhjeje që do të lehtësojë fluksin e udhëtarëve në pikën kufitare të Morinës.

Takimi vjen në një kohër kur një vendim i Qeverisë së Kosovës, i kërkon udhëtarëve që nuk ka targat e Kosovës në automjetin e tyre, të paguajë një taksë siguracioni. Kjo ka krijuar radhë të gjata makinash në Pikën kufitare të Morinit të mërgimtarëve që kthehen me pushime. 

Pse krijohen radhët?
 Këto radhë krijohen sepse makinat me targa të huaja me përjashtim të mjeteve me targa të Shqipërisë duhet të paguajnë siguracion për të hyrë në Kosovë. Bazuar në vendimin e  Ministrisë së Financave të Kosovës, është e nevojshme regjistrimi, për të përfituar rimbursimin e siguracionit.

Propozohet zgjidhja

Në takimin me homologun kosovar, ministri i Brendshëm Taulant Balla veç shqetësimit ka ofruar dhe mundësi zgjidhjeje për ti ardhur në ndihmë qytetarëve. Propozohet që pajisjen me siguracion mos ta bëjnë më në pikën kufitare por brenda një distance, 50-100 km.

"Arsyeja e këtij takimi është një kërkesa e imja, gjatë fundjavës së kaluar në kontakt me Ministrin Sveçla.. Shqetësimi im është që sa kohë që mërgimtarët bëjnë me orë të tëra udhëtim nga gjithë Europa e jo vetëm për t’u kthyer, të gjejmë të gjitha mundësitë që gjatë kthimit të tyre në Kosovë përmes Pikës së Kalimit të Morinës, koha të jetë shumë e shkurtër. Ose të gjejmë modalitetet sesi t’i japim një zgjidhje që pajisjen me siguracion, mos ta bëjnë më në pikën e kalimit kufitar, por, një propozim ka qenë, ta bëjnë brenda një kohe të caktuar, sapo hyjnë në territorin e Republikës së Kosovës, ose brenda një distance të caktuar. Në shumë vende p.sh., ka një model që brenda një distance, 50-100 km, ke kohën ose mundësinë për t’u pajisur me këtë siguracion. Mendoj që një prej arsyeve të këtij niveli të lartë të këtij trafiku është pikërisht kjo" tha Balla.

Takimin e ka kërkuar ministri i Brendshëm Taulant Balla, i cili tha se ka kërkuar nga homologu i tij që të gjendet një zgjidhje të shpejtë. Në anën tjetër ministri Sfeçla tha se ka vullnet politik për të ardhur shumë shpejt tek kjo zgjidhje.

"Ne kemi vullnetin më të mirë të mundshëm që mërgatave tona, t’iu shërbejmë shpejt, me efikasitet dhe po mendojmë disa variante se si të tejkalohen këto vështirësi.Biseduam edhe me ekipet tona, zgjidhje ka. Patjetër që ka një vullnet të jashtëzakonshëm politik dhe unë besoj se shumë shpejt do të vërehen ndryshime të rrënjësishme" tha ministri Sveçla.

Ministri i Brendshëm la të kuptojë që zgjidhja të arrihet për çështje ditësh.

Pyetja e gazetarit: Variante pas gushtit, pasi të mbarojë sezoni, se vera iku?!
Ministri Sveçla: Jo, assesi, ne tashmë, është hera e dytë, për disa ditë që unë jam këtu. Ka tashmë përmirësime, por po flasim për zgjidhje tash, menjëherë.

Ky takim nuk do të jetë i vetmi mes dy ministrave, por duket që do të pasohen nga të tjerë.

Taulant Balla: "Mos u habisni unë do të takohem shumë shpesh, sepse kemi shumë marrëveshje të firmosura tashmë të cilat duhet të zbatohen. Mërgimtarët presin prej nesh të gjejmë një zgjidhje për këtë çështje. Unë mendoj që do ta gjejmë një zgjidhje për këtë çështje. Sa për çështjet e tjera kemi kohë të flasim dhe natyrshëm ajo që i takon dy ministrave, është të zbatojnë marrëveshjet për të cilat kryeministrat kanë firmosur " 

Xhelal Sveçla: Ne kemi shumë marrëveshje, të cilat janë të nënshkruara mes dy ministrive dhe po punojmë intensivisht që të gjitha ato marrëveshje të implementohen edhe në realitet.

Takimi vjen 11 ditë pasi Taulant Balla mori drejtimin e Ministrisë së Brendshme dhe në kulmin e mospërputhjeve mes Prishtinës dhe Tiranës zyrtare, që lindën pas anulimit të mbledhjes së përbashkët të dy qeverive.

Rendit zhvillimet sipas orarit:

Të Fundit Të Parat

S.G/Shqiptarja.com

TAG:
• morine
• Kukes