Që nga orët e para të mëngjesit, banorët e fshatit Rrjoll në Velipojë protestuan duke bllokuar rrugën për punonjësit e kompanisë “Gener 2” të biznesmenit Bashkim Ulaj, i cili po ndërton një resort luksoz në Velipojë.

Banorët kanë qëndruar para kantierit për të penguar makineritë dhe punonjësit që të hynin në pronat e tyre. Por rreth orës 08:30, në vendngjarje kanë mbërritur efektivët e policisë, të cilët u përplasën me banorët për t’i hapur rrugë punimeve.

Gjatë ndërhyrjes, policia ka shoqëruar gjashtë persona, mes tyre edhe një grua, Luçiana Kokaj, e njohur për pjesëmarrjen aktive në protestat që vijojnë prej më shumë se dy javësh.

Pasi u larguan nga kantieri, banorët u mblodhën në qendër të fshatit Rrjoll, ku shprehën vendosmërinë për të vazhduar betejën e tyre për mbrojtjen e tokës, duke drejtuar thirrje drejtpërdrejt kryeministrit Edi Rama dhe gjykatave.

“Kemi shkuar në orën 6:30 për të ndaluar makineritë në pronat tona. Në orën 9 erdhën furgonat dhe na sulmuan me skafandra. Pse nuk na ndihmojnë? Duam drejtësi. Nuk do të dorëzohemi deri në vdekje”, shprehu një banor.

Me statusin e investitorit strategjik, Bashkim Ulaj në fillim të shkurtit nisi punimet për ndërtimin e “Blu Borgo” në një sipërfaqe prej 146 hektarësh. Projekti parashikon 33 struktura akomoduese dhe shërbimi, me objekte nga 3 deri në 10 kate mbi tokë dhe një kat nëntokë, ndërsa subjekti zhvillues është shoqëria “ABA Blue Borgo”. Ndërsa banorët pretendojnë se ky resort po bëhet në pronat e tyre, që ua ka grabitur me letra false një person me emrin Fatmir Shpellza, i cili më pas ia ka shitur botuesit Bashkim Ulaj.