Barack Obama-Raul Castro
takim historik në Panama

Presidenti amerikan Barack Obama është larguar nga Samiti i Amerikave në Panama pas një takimi historik me presidentin e Kubës Raul Castro. 

Obama thotë se do të shqyrtojë rekomandimet për të hequr Kubën nga lista e shteteve që sponsorizojnë terrorizmin, një tjetër hap që duhet ndërmarrë para rihapjes së ambasadave në Uashington dhe Havana.

Pak kush mund ta kishte imagjinuar këtë pamje: presidentët e Amerikës dhe Kubës që bisedojnë për normalizimin e marrëdhënieve pas më shumë se gjysëm shekulli armiqësie.  Presidenti Barack Obama:

“Është një takim historik. Historia mes Shteteve të Bashkuara dhe Kubës është e ndërlikuar dhe gjatë viteve është krijuar shumë mosbesim.”   

Por presidenti Obama thotë se është koha për të kaluar këtë faqe, dhe presidenti Castro është dakord.

“Ajo që shprehu presidenti amerikan reflekton të njëjtën gjë që mendojmë edhe ne.” 

Që të dy pranuan qendrimet e ndryshme që egzistojnë mes dy qeverive.

Skena që tregon mbështetësit e Castros që sulmojnë disidentët kubanezë jashtë ambasadës së Kubës në Panama është kujtesë se situata e të drejtave të njeriut në Kubë mbetet një çështje e mprehtë.

Zoti Castro tha se ishte i gatshëm për të diskutuar gjithçka, dhe presidenti Obama thotë se do të vazhdojë të shprehë shqetësimet amerikane mbi liritë politike në Kubë.

Por udhëheqësi amerikan kërkon të përqendrohet tek e ardhmja dhe nuk do të ngecen tek ideologjia. 

“Lufta e Ftohtë ka marrë fund prej kohësh dhe nuk kam interes të merrem me beteja që kanë filluar para se të lindja unë.”  

Presidenti Obama tha se kishte shkuar në Samit për të rritur angazhimin e tij në hemisferë.  

Në këtë samit, një ngjarje që zakonisht nuk vihet re nga media, shtrëngimi i duarve dhe fjalët pajtuese, shënojnë fillimin e një ndryshimi të madh të klimës politike.

TAG:
• OSBE