Partizani nuk arrin të bëjë dy fitore radhazi dhe të ngjitet në vendin e katërt në renditjen e Kategorisë Superiore. Pas suksesit 6-0 ndaj Lushnjës, sot Partizani po udhëhiqte me një gol në Durrës ndaj Teutës deri në sekondat e fundit. Një transfertë e vështirë për të besuarit e Starovës, që nuk e kanë zgjidhur me sukses në sekondat e fundit.

Në minutën e 24-t, Progni, që më parë ka luajtur për Teutën, tregohet i vëmendshëm dhe gjuan me të parën. Kujtojmë që përpara golit durrsakët humbën penallti, kur Hoxha u tregua i saktë me pritjen e tij. Teuta u përpoq të merrte një pikë dhe ia ka dalë në fund.

Në aksionin e fundit, ishte portieri i Teutës, Shpëtim Moçka, që kishte lënë portën e tij dhe kërcen me kokë, duke ndëshkuar të kuqtë. Nuk ka më kohë dhe ndeshja përfundon në barazim 1-1. Partizani ngjitet në vend të pestë, ndërsa Teuta barazon Vllazninë në vendin e parafundit, me shkodranët që luajnë nesër ndaj Flamurtarit.

Teuta-Partizani 1-1

Moçka 94’ / Progni 24’

Teuta: Moçka, Hakaj, Shkalla, Bilali, Beqja, Gjorgjievski, Lajthia (46′ Dediç), Hila (78′ Kruja), Alhasan (67′ D. Bilali), Çyrbja, Latif. Trajner: Gentian Begeja.

Partizani: Hoxha, Kotobelli, Belica, Gojkoviç, Ibrahimi, Trashi, Batha, Mala, Asani (60′ Culum), Progni, Bardhi. Trajner: Sulejman Starova.

Kartonë të verdhë: Shkalla / Belica, Gojkoviç

Gjyqtar: E. Hamiti

VIDEO/Goli i Portierit të Teutës në minutën e fundit shtesë

s.k/Shqiptarja.com