Basha dhe Bakojanis, firmat e
buzëqeshjes mbi marrëveshje

TIRANE- Pakti Detar me Greqinë u firmos në 2009-n nga ish-ministria e Jashtme Greke, Dora Bakojanis dhe ish-ministri i Jashtëm, Lulzim Basha, sot kreu i Partisë Demokratikë në opozitë. Të dy ish-ministrat para dhe pas momentit të këtij pakti, janë shfaqur të buzëqeshur, duke nënkuptuar se të dyja palët ishin tepër të kënaqura nga kjo marrëveshje detare për përcaktimin e kufirit ujor mes dy vendeve fqinje. Mjaft i lumtur në atë kohë shfaqej Lulzim Basha, por pa ditur se kush kishte dalë i humburi dhe i fituari.

Opozita e atëhershme e ankimoi këtë marrëveshje në Gjykatën Kushtetuese me pretendimin se vendi humbte 354.4 km katrorë sipërfaqe ujore prej saj. Në janar 2010 Gjykata e rrëzoi Paktin Detar duke e shpallur antikushtetues dhe në dëm të interesave kombëtare.

Fill pas ardhjes në pushtet të socialistëve ministri aktual i Jashtëm Ditmir Bushati i kërkoi kryeprokurorit Adriatik Llalla të nisë hetimet për çështjen e faljes së detit, duke e konsideruar atë si një tradhti të lartë kundër kombit shqiptar. Pas kësaj deklarata Llalla urdhëroi nisjen e hetimeve duke marrë indicie nga një shkresë informative të dërguar në zyrën e tij. Momentalisht hetimi është ende në fazën e pyetjes së personave që kanë qenë protagonistë në këtë marrëveshje, dhe se sipas prokurorisë është ende herët për të dalë në konkluzione lidhur me përgjegjësit e këtij krimi.

Në nenin 210 të Kodit Penal, thuhet tekstualisht se “Marrëveshja e bërë me fuqi apo shtete të huaja për dorëzim pjesërisht ose tërësisht të territorit apo të forcave të armatosura e materialeve mbrojtëse, me qëllim për të cënuar integritetin e vendit, dënohet me burgim nga pesë gjer në dhjetë vjet burg”. Hetimet për këtë çështje pritet të shtrihen deri në struktura të larta shtetërore, dhe jo vetëm në rangun e ekspertëve ushtarakë apo diplomatësh. Ndërkohë pa u përjashtuar nga ky hetim janë dhe një sërë drejtorësh në ministrinë e Jashtme si dhe ish-drejtoresha e Institutit Gjeografik të Ushtrisë Shqiptare Miranda Zeka.

Redaksia Online
(shqiptarja.com)