Basha, lushnjarëve: Ejani në protestë
PS ironizon: Bashkojuni trafikantëve

LUSHNJE – Nga Lushnja ku zhvilloi një takim me militantët e Partisë Demokratike, lideri i kësaj force politike Lulzim Basha, i ftoi demokratët e kësaj krahinë t’i bashkëngjiten protestës së premtes kundër qeverisë Rama.
 
Papunësia, korrupsioni, por mbi të gjitha trafiku i drogës, janë arsyet se pse demokratët sipas liderit të tyre duhet të mbushin sheshin në protestën e 23 majit.
 
Basha ndërkohë u ndal edhe emërimet në administratë të personave që kanë precedentë penalë.
 
Basha theksoi se trafiku i drogës po merr përmasa të patolerueshme në shoqërinë shqiptare.

Përkundër thirrjeve të Bashës, nga selia e PS-së ka dalë deputetja Esmeralda Shkjau, e cila gjithashtu iu ka drejtuar një thirrje ironike qytetarëve, duke i ftuar ata t’i bashkohen protestës së atyre që bashkëpunojnë me kriminelët dhe trafikantët.

PS IRONIZON THIRRJEN E PD: PROTESTONI ME KRIMINELE E TRAFIKANTE
Partia Socialiste, në një dalje për shtyp, ka reaguar ndaj thirrjeve të opozitës për një tjetër protestë të premten e 23 majit. Në fjalën e saj deputetja e PS Esmeralda Shkjau, ironizoi thirrjen e PD për protestë ndaj qytetarëve duke shtuar se thirrjet në protestë sipas saj e bëjnë personat të cilët bashkëpunojnë me kriminelët e trafikantët.
 
“Qytetarë dilni në protestë dhe mbështesni ata që për tetë vjet me radhë ngritën bastionin e drogës në Lazarat, linjat e drogës në tokë, det e mesa duket edhe ajër! Dilni e protestoni bashkë me prodhuesit e drogës, të cilët sigurisht sot kanë të gjitha arsyet pse të jenë të pakënaqur nga puna e policisë dhe e shtetit, që trafikun e drogës po e ndëshkon. Dilni në protestë dhe mbështesni ata që hapen kanalet e kontrabandës së naftës dhe cigares, që sigurisht sot janë të mërzitur pasi pagesat e majme për djalin apo vajzën e kryeministrit nuk ua hapin më dyert si gjatë tetë viteve të fundit.

Dilni të premten në protestë për të mbështetur organizatorët e shpërthimit tragjik të Gërdecit dhe vrasjeve të 21 Janarit, që sot më shumë se kurrë kanë filluar ti tremben drejtësisë, që mund të vonojë ende se ende e kanë në dorë me veglat e tyre, por s’do harrojë në asnjë mënyrë të çlirohet e të bëj drejtësi.” tha Shkjau
 
Ndër të tjera Shkjau tha se opozita po shpif ndaj punës së qeverisë me akuza e protesta për të ndalur rrugën Europiane të Shqipërisë, në një kohë kur vendi pritet të marrë përgjigjen e statusit kandidat. Ajo shtoi  se edhe autoritetet gjermane falenderuan punën dhe bashkëpunimin e policisë shqiptare në luftën kundër korrupsionit.
 
“Të gjithë në protestë, bashkë me punonjësit e ujësjellësit e të gjelbërimit të Bashkisë Tiranë, pavarësisht se sot gjermania zyrtare falenderon Policinë e Shtetit shqiptar për punën e kryer dhe bashkëpunimin e shkëlqyer në ndaljen e trafikut të drogës. Dilni në protestë, pasi tani që statusi i vendit kandidat duket thuajse i sigurtë, tani që të gjitha fuqitë e mëdha duan ta mbështesin Shqipërinë, opozita sigurisht që duhet të tentojë çdo gjë për ta ndalur rrugën tonë drejt Europës. Të dashur miq, në emër të kryetarit të Partisë Socialiste, të Grupit tonë Parlamentar, ju kërkojmë thellësisht ndjesë për shqetësimin e krijuar nga kjo valë tërbimi pseudo-opozitar. Shpif shpif se diçka do të mbetet është motoja e tyre, lufto e prapë lufto kundër krimit e korrupsionit është motoja e secilit prej nesh. Dhe sot fatkeqësisht, kjo opozitë e mjerë është bërë pasqyra ku krimi e korrupsioni frymëzohen duke mos u ndjerë vetëm në luftën me shtetin e me ligjin.” përfundoi Shkjau

Redaksia online
(arsh/es/Shqiptarja.com)
 
 

TAG:
• lazarat