Basha në Durrës: 5 kërkesa urgjente për qeverinë pas tërmetit

Në qytetin e Durrësit që edhe u prek më së shumti nga tërmeti i rënë, ka qenë kreu i PD-së Lulzim Basha, i cili ka parë nga afër shtëpitë e dëmtuara nga lëkundjet e tërmetit. Kryedemokrati ka bërë apel që të merren masa për t’u ardhur në ndihmë banorëve, që nga evidentimi i dëmeve deri tek kreditë e buta për bizneset.

“Në Durrës me një nga shumë familjet e dëmtuara nga tërmeti. Banorët kanë nevojë për mbështetje dhe jo propagandë!
Kërkojmë urgjentisht:

• Të bëhet evidentimi dhe transparenca e dëmeve për çdo banesë dhe biznes.
• Të caktohet dhe shpallet publikisht fondi i posaçëm i buxhetit për riparimin e banesave të prekura.
• Të pezullohen pagesat e ujit dhe energjisë për familjet e dëmtuara, deri në stabilizimin e gjendjes.
• Pezullimin e taksës së pronës deri në rikuperimin e dëmeve të shkaktuara.
• Mbështetje me kredi të buta për bizneset që kanë pësuar dëmtime nga tërmeti.” shkruan Basha.

Tërmeti i fuqishëm që goditi vendin tonë të shtunën e 21 shtatorit solli dëmtimin e qindra banesave, kryesisht në Tiranë dhe në Durrës. Qeveria ka nisur punën duke ngritur grupet e punës për verifikimin e dëmeve në terren.

TAG:
• lulzim basha
• PD
• Termet i fuqishem ne Shqiperi