Basha në zgjedhjet e PD në Tropojë 
e Has: Po forcohemi e riperterihemi

KUKES - Nga qarku Kukësit, Lideri Demokrat Lulzim Basha u shpreh se me zgjedhjet e reja Partia Demokratike ka ripërtëritur forcat e saj dhe ka sjellë energji dhe frymëzim të ri në gjirin e së djathtës.

"Partia Demokratike ka vendosur në themel të organizimit të saj një parim të thjeshtë që është vota e lirë e anëtarëve të PD-së. Se vetëm me votë të lirë, sot e nga mot do ta bëjmë Partinë Demokratike më të madhe, më të fortë, më të bashkuar, më tërheqëse për rininë, dhe më të sigurtë në rrugën e saj si alternativa e pushtetit të së djathtës në Shqipëri." tha Basha

Basha ka deklaruar se pushteti i votës mbetet në duart e zgjedhësve, po aq ka shprehur besimin se demokratët duhet të marrin më shumë përgjegjësi përmes votës së tyre.

"​Të gjithë jeni aksionerë të barabartë në qeveri. Askush nuk ka tagër që t’ju thotë demokratëve se për kë të votojnë. Kjo parti ka lindur e lirë, me vullnetin e lirë të Azem Hajdarit, të Sali Berishës dhe të themeluesve të tjerë. Me vullnetin e Zotit dhe me vendosmërinë timen e tuajën do të mbetet parti e njerëzve të lirë." u shpreh Lulzim Basha

Kryetari i Partisë më të madhe të djathë mori pjesë në kuvendet zgjedhore në Tropojë dhe Has ku janë zgjedhur përfaqësuesit e rinj të saj. Prej një jave Basha ka vizituar një numër të madh procesesh zgjedhore nëpër rrethe për ta kulmuar atë në Tiranë.

Redaksia Online
(e.c/shqiptarja.com)