Kryetari i Partisë Demokratike përmes një postimi në rrjetin social Facebook ka thënë sot se kryeministri i vendit Edi Rama ka heshtur sot në Parlament për blerjen e votave në Dibër, ndërkohë që e ka akuzuar atë se ka firmosur një kontratë të re me krimin.

Basha ka theksuar se, blerja e votave u pa nga gjithë shqiptarët, ku e ka krahasuar me një kartel droge që shumë shpejt shqiptarët do ta vënë përpara.

Ja statusi i tij në Facebook
Edi Rama e respektoi sot kodin e heshtjes me Kartelin e Drogës, duke mos thënë asnjë fjalë për blerjen e votës edhe pse i madh e i vogël kanë parë me zë e me figurë se si mbinë në gjithë Dibrën kioskat ku një vote për kandidatin e tij blihej me lekë e me euro. 
Karteli i tij i drogës bleu mijëra vota në vendin anëtar të NATO-s, kandidat për anëtarësim në BE, por Rama nuk tha asnjë fjalë të vetme. Duke ruajtur kodin e heshtjes, ai nënshkroi sot nga podiumi i Parlamentit një kontratë të re me krimin, pasi punë të tjera i presin, zgjedhjet po vijnë. 
Sado te forcohet karteli i drogës, sado të blejnë votat, të ndërtojnë pista avionësh, ate e pret një fund fatal, sepse nuk e mundin dot një shoqëri të tërë, nuk e inkriminojnë dot një komb.
Edi Rama ka zgjedhur të ketë fundin e kartelit të drogës, dhe atë fund do të ketë kur populli ta vërë para. 
Ajo ditë po vjen me shpejtësi, dhe atij nuk do ti bëjnë më punë as opingat e krimit e as avionët e drogës. #Shqiperia me mire pa Edi Ramen.​

Redaksia Online
(F.T/shqiptarja.com)