Basha nga Shkodra: Kur Berisha do marrë përgjegjësinë e të iki si unë? I fryn përçarjes dhe nxit dhunën për interesa familjare! Vendimi i gjykatës ilegjitim, PD s’bën para me 'Non Gratat'

Lulzim Basha ka folur për herë të parë nëse do të rikandidoj apo jo për kreun e PD, duke mos e lënë të qartë. Nga Shkodra, ai tha se nuk është këtu për të folur për veten por të ndihmojnë në ringritjen e demokratëve.

“ Jo nuk behet fjalë fare, nuk flas unë këtu as për kandidim as për rikandidim, unë po flas për shqiptarët dhe shkodranët. Nuk i jap luksin askujt që të përgjigjem për veten time, nuk jam këtu për veten time. Jam këtu për vlerat e shkodraneve, se të ishte për veten time kam vite që për fat te keq kam braktisur jetën familjare, prindërit e mi, dhe do kisha si ta shpenzoja kohën e lirë por jam këtu për t’i qëndruar fjalës së dhënë”, tha Basha.

Basha ka bërë të qartë se nuk do të takohet me Berishën.

“Unë refuzoj propagandën dhe veglat e regjimit të vjetër që të riciklohen 30 vite pas shembjes së regjimit për hir të fatit të një personi apo në tjetëri”, tha Basha.

Lulzim Basha i ka cilësuar mashtrime fjalët se mund të krijojë parti të re. Ai tha se është i fokusuar vetëm në ringritjen e PD dhe demokratëve për të mposhtur regjimin. I pyetur nga mediat rreth deklaratave të ish-kryeministrit Berisha, se ish-kryedemokrati do të ishte kandidat për president, Basha tha se refuzon gënjeshtrat.

“Mos u merrni me mashtrimet e  përditshme, mos humbni kohën tuaj. PD është sot në krizë të thellë pikërisht për shkak të propagandës dhe mashtrimeve. Mos bini pre e trukeve. Çdo ditë non gratat shpallin gënjeshtra për të hequr vëmendjen nga e vërteta. Demokracia është në krizë, ekonomia në krizë dhe shoqëria në krizë. Nuk ka gënjeshtër për të hequr vëmendjen nga të vërtetat”, tha Basha

Lulzim Basha ka folur edhe për dyert e blinduara që vendosi në PD para protestës së dhunshme të 8 janarit, ku tha se ato ishin masa të nevojshme për të mbrojtur demokratët nga dhuna fizike që nxiti Berisha.

“Ai nxiti sulmin fizik ndaj PD. Ato ishin masa mbrojtëse ndaj konfliktit dhe dhunës së nxitur nga gjuha e një njeriu për interesat të familjes”, tha Basha.

Lulzim Basha e quajti vendimin e Gjykatës i cili njohur statutin e Berishës si ilegjitim.

"PD është në një krizë për shkak të propogandës që po bëhet. E ardhmja ime është e ardhmja e përditshme e çdo shqiptari, të qëndrojmë fort për vlerat e parimet. Kam bërë shumë gabime por jo faj. Shqiptarët jetojnë në skllavëri moderne dhe mposhtja e sistemit është qëllimi kryesor", tha Basha

Lulzim Basha nuk mori pjesë në mbledhjen e grupit që u zhvillua disa ditë pas dorëheqjes së tij, ku i pranishëm ishte edhe Sali Berisha. I pyetur nëse do të marrë pjesë në mbledhjet e tjera, Basha tha se grupi duhet të çlirohet nga ai që e sheh partinë si pronë private.

“ Unë besoj se grupi parlamentar i PD duhet të ketë lirinë të vendosë i lirë pa trysni nga Berisha që e shikon PD si pronë private”, tha Basha.