Basha: Taksa e korrupsionit po dërrmon ekonominë! Më 25 prill do çlirojmë vendin nga pengmarrja, ndryshimin do e drejtoj unë! Nxisim të rinjtë të kthehen e të bëhen sipërmarrës

Kreu i PD Lulzim Basha gjatë takimit me të rinjtë ka hedhur akuza ndaj qeverisë duke thënë se sipas tij korrupsioni po e shkatërron ekonominë tonë.

Ai thotë se më 25 prill do ta çlirojë vendin nga nga pengmarrja politiko ekonomike.

"Taksa e korrupsionit po dërrmon ekonominë. Më 25 prill duam ta çlirojmë Shqipërinë nga pengmarrja politiko ekonomike. Rritja e pagave është premtimi ynë. Kur të vijnë në pushtet do bëjmë një pagë minimale me jo më pak se 400 euro. Rama mendon se do ta rrisë pagën me VKM. Jemi vendi me të ardhurat më të ulëta në Ballkan. Plani ynë ekonomik, zgjerimi i shtresës së mesme. Shtresa e mesme, një fuqi shoqërore që garanton demokracinë. 25 prilli do jetë rikthim i fytyrës njerëzore të politikës. Politika ka humbur fytyrën njerëzore", tha Basha.

Kreu i PD Lulzim Basha gjatë bashkëbisedimit me të rinjtë ka thënë se qeveria e ardhshme ka për qëllim që të sjellë ndryshimin dhe këtë ndryshim kryedemokrati thotë se do ta drejtojë vetë, duke pasur parim vetëm standardet europiane.

"Ka qenë një kohë kur vendi ecte përpara, kur kishte vetëbesim shoqëria, ekonomia, ku ndërtohej infrastruktura, kur hiqeshin vizat, kur futej vendi në NATO dhe kjo e gjitha reflektohej në klimën e përgjithshme psikologjike, ekonomike, shoqërore, po natyrisht i takon qeverisë të japë impulse pozitive, siç i takon prindit ta udhëheqë fëmijën dhe familjen drejt mirëqenies apo drejt harmonisë, ashtu i takon qeverisë të japë shembull. Ka ardhur koha tani që çdokush që e do këtë vend te bëhet pjesë e ndryshimit. Ndryshimi s’mund të vijë për shkak të një njeriu të vetëm. Ndryshimi ka dhe do të ketë fytyrën e të gjithë atyre që janë jo thjesht të tejngopur me situatën aktuale, por të vendosur për ta ndryshuar atë.

Qeveria e ardhshme ka për detyrë ta drejtojë këtë ndryshim dhe këtë do të bëjë. Për këtë zotohem që ne do ta drejtojmë këtë ndryshim. Unë do ta drejtoj këtë ndryshim duke pasur kriter dhe parim bazë vetëm standardet europiane. Por për këtë duhet ndihma e të gjithëve, duhet që askush të mos bëjë kompromis me të keqen. Sigurisht, gabime do të ketë edhe dështime mund të ketë, por për sa kohë që nuk ka kompromis me të keqen, për sa kohë që ajo që na frymëzon e na motivon është bindja se Shqipërisë nuk i mungon asgjë për të siguruar normalitetin europian, për të siguruar shtetin e së drejtës, për të siguruar zgjedhje të lira dhe të ndershme, për të siguruar një ekonomi reale, funksionale, që krijon vende pune", iu tha Basha të rinjve.

Kreu i PD Lulzim Basha në një bashkëbisedim me një grup të rinjsh që studiojnë dhe kanë mbaruar studimet në universitetet jashtë vendit tha se që të ketë punësim dhe mundësi biznesi për të ta, duhet të ketë një ekomomi të lirë dhe të shëndetshme.

"Problemi kryesor i ekonomisë sot është monopolizimi, fakti që gjithë ekonomia vërtitet rreth 3-4 klientëve të qeverisë. Aty shkojnë lejet e ndërtimit, aty shkojnë lejet dhe licencat esksluzive, aty shkojnë tenderat, aty shkojnë koncesionet, aty shkojnë PPP.

Si mund të presësh që aktorët e tjerë në treg që kanë ide, që kanë plane që kanë inovacion, kanë dëshirën, kapitalin apo aftësinë për të marrë kredi dhe për të investuarm ta bëjnë këtë kur ata që duhet ta mundësojnë fushën e barabartë të lojës në treg, që është qeveria, është sundimi i ligjit, janë praktikisht ata që e kanë shkatërruar fushën dhe në këtë mënyrë krijohet një kulturë e frenimit të iniciativës, të favorizimit të një grushti njerëzish me lidhje dhe ndëshkimit të gjithë pjesës tjetër të shoqërisë".

Një nga të rinjtë, ngriti edhe shqetësimin e rritjes së arrogancës së qeverisë, që si pasojë ka riformatimin e një shoqerie indiferente. Por për shefin e opozitës, ka ende shpresë për këtë vend, pasi sipas tij, ndryshimi ka dhe do të ketë fytyrën e rinisë. Sipas tij në 7 vite qeveria ka marrë vendime të gabuara.

"Shqipëria është me fat që jemi këtu dhe unë jam me fat. Së bashku do ta ndryshojmë, për këtë mos keni asnjë pikë dyshimi. Edhe unë kam qenë në pozita të tilla. Mos harroni, nuk jam këtu sepse kam qenë këtu përherë. Kam qenë student jashtë, kam parë me trishtim të madh ndryshimin që rritej midis shoqërisë ku jetoja dhe studioja dhe shoqërisë shqiptare, dhe kam qenë 1000% i bindur, i motivuar që Shqipëria mund të ecte ne hapat e duhur dhe nuk do t’i mungonte asgjë. Përkundrazi, ne e njohim shoqëritë ku kemi studiuar e punuar, asgjë nuk na mungon, asgjë nuk ju diferencon ju me rininë bashkëkohore europiane", tha Basha.

Duke u ndalur në problemet me të cilat sipas tij haset sot ekonomia, kreu I PD premtoi se do ta bëjë vendin konkurrues në treg. 

"Problemi kryesor i ekonomisë sot është monopolizimi, fakti që gjithë ekonomia vërtitet rreth 3-4 klientëve të qeverisë. Aty shkojnë lejet e ndërtimit, aty shkojnë lejet dhe licencat esksluzive, aty shkojnë tenderat, aty shkojnë koncesionet, aty shkojnë PPP.”