Bashkëpunim dypalësh/ Gjonaj takim me homologun kosovar: Në qershor plotësohet Gjykata Kushtetuese në Shqipëri

Ministrja e Drejtësisë, Etilda Gjonaj, e shoqëruar nga dy anëtarë të Këshillit të Lartë Gjyqësor, me ftesë të ministrit të Drejtësisë, Abelard Tahiri, zhvilloi një vizitë në Kosovë.

Vizita zyrtare nisi fillimisht me takimin me ministrin e Drejtësisë dhe delegacionet përkatëse. Gjatë takimit u fol për bashkëpunimin që kanë të dy shtetet në fushën e drejtësisë, duke u ndalur te Reforma në Drejtësi si dhe bashkëpunimi rajonal.

Ministrja Gjonaj i bëri me dije homologut të Kosovës se “është e hapur për një bashkëpumim në të gjitha fushat, por në veçanti për reformën në drejtësi, duke vendosur ura lidhëse mes organeve të reja të drejtësisë të Shqipërisë dhe Kosovës, si dhe për të shkëmbyer përvoja, sidomos midis këshillave të prokurorisë dhe gjyqësorit”. “Dua të theksoj se partnerët tanë ndërkomëbtarë po na mbështesin financiarisht dhe me ekspertizë të vyer për zbatimin e reformave”, theksoi ministrja Gjonaj.

Shqipëria është në fazën finale të ngritjes së SPAK-ut, që do të hetojë krimin e organizuar si dhe korrupsionin në nivele të larta”.

Ndërkohë, ministri i Drejtësisë në Kosovë, Abelard Tahiri, tha se partitë opozitare në Kosovë kanë qenë bashkëpunuese. “Janë votuar të gjitha ligjet e çuara në Kuvend nga qeveria e Kosovës, për reformimin e sistemit të drejtësisë”, shtoi Tahiri.

Ministrja e Drejtësisë tha se “brenda muajit qershor pritet të emërohen gjyqtarët e Gjykatës Kushtetuese”.

“Do të rrisim masat ndëshkuese dhe parandaluese për krimin e organizuar dhe asetet kriminale, si dhe për pastrimin e parave të organizatave kriminale”, tha Gjonaj.

Ministrja e Drejtësisë njoftoi nga Prishtina se do të ulet numri i noterëve. “Ndërkombetarët na rekomanduan të ulim numrin e noterëve. Aktualisht kemi një raport, 1 noter për 6 mijë banorë, se shpejti do të jetë 1 noter për 15 mijë banorë”, tha Gjonaj.

Në fund të takimit, Gjonaj propozoi që “Ministrat e Drejtësisë të luajnë një rol proaktiv dhe të jenë promotorë të një bashkëpunimi rajonal, si një komb e dy shtete”.

TAG:
• etilda gjonaj