Bashkia: Për Ramën lufta politike
vjen para interesave të qytetarëve

TIRANË - Bashkia e Tiranës e përmes një deklarate ka reaguar ndaj kërkesës së socialistëve për dorëheqje të Bashës pasi nuk ka mbajtuar asnjë nga premtimet e tij, duke u shprehur se Edi Rama ka intensifikuar fushatën e shpifjeve dhe përbaltjes kundër këtij institucioni. Sipas këtij institucioni këto deklarata vijnë pasi Rama është tërbuar nga dështimi në qeverisje.

Më tej në deklaratë shtohej se qytetarët nuk harrojnë se Rama ka bllokuar për gjysmë viti buxhetin, shpronësimet për varrezat, investimet e reja për çerdhet, kopshtet dhe shkollat.
 
“E vërteta është se Edi Rama ka bllokuar investime strategjike dhe mijëra vende pune për qytetarët e Tiranës dhe kjo sepse për Ramën lufta politike vjen para interesave të qytetarëve.”-thuhet në Deklaratë.
 
Deklarata e plotë e Bashkisë Tiranë
I tërbuar nga dështimi spektakolar në qeverisje, Edi Rama ka intensifikuar fushatën e shpifjeve dhe përbaltjes kundër Bashkisë së Tiranës. Qytetarët e Tiranës nuk harrojnë se është ai që bllokoi për gjysmë viti buxhetin, shpronësimet për varrezat, investimet e reja për çerdhet, kopshtet dhe shkollat.
 
Qytetarët e Tiranës e dinë se Edi Rama i verbuar nga zilia dhe marazi politik urdhëroi bllokimin e bulevardit të ri të Tiranës dhe të terminalit multimodal të pasagjerëve. Edi Rama ka bllokuar garancinë sovrane për projektin e tramit. E vërteta është se Edi Rama ka bllokuar investime strategjike dhe mijëra vende pune për qytetarët e Tiranës dhe kjo sepse për Ramën lufta politike vjen para interesave të qytetarëve.
 
Bashkia e Tiranës është e vendosur të vazhdojë çdo ditë luftën dhe përpjekjet për t’u shërbyer qytetarëve pa dallim dhe interesave të tyre, për një Tiranë më të mirë.
 
Redaksia Online
(a.h/shqiptarja.com)