Kreu i Rithemelimit gjatë një takimi me qytetarët në Fushë-Arrëz,  komentoi edhe takimet e kryeministrit Edi Rama me gratë dhe vajzat në qytete të ndryshme të vendit. Berisha tha se nënat shqiptare nuk mund të mashtrohen nga një person që u ka larguar djemtë nga vendi. Më tej shtoi se këto takime të Ramës me gratë dhe vajzat bëhen vetëm për fasadë dhe propagandë.

“Një grup si organizatë kriminale përvetëson fondet përvetëson buxhetin. Edi Rama nuk ka asnjë respekt. Nuk ka patur kurrë njeri në politikë që i urren më shumë se ai gratë. Por bën fasadën. Emëron 12 ministre dhe unë haptas e kam lavdëruar, i kam thënë shumë mirë bëre.

Nëse ato nuk harrojnë se janë bashkëshorte dhe janë nëna ato janë më të dobishme se burrat kudo të jenë. Por ato janë si të jenë bodiguardet e Muhamed Gaddafit. Vriten 5 gra në një ditë në Tiranë nuk i dëgjon një herë. Ju e dini shumë mirë cili ka qenë kodi ynë patriarkal për gratë. Kryeministri dhe ministret nuk thonë një fjalë”-shtoi kreu i Rithemelimit.

Ndërsa mes të tjerash, ai akuzoi Ramën se në kohën kur mori mandatin, OSBE i tha se kishte 200 milionë euro të fshehura në llogaritë ‘offshore’. Sipas Berishës ekziston një raport i OSBE për këtë akuzë duke shtuar se Rama nuk ndërmori asnjë hap duke mos hapur asnjë çështje gjyqësore apo ta mohonte.

“Kur filloi detyrën si kryeministër, OSBE i tha Edi Ramës se ke të fshehura 200 mln euro në kontot ofshore. Më shifër me raport. Edi Rama kurrë nuk guxoi ta kundërshtoi as ta hedhë në gjyq.   Se çdo njeri po të të thonë një gjë që ti se ke, atëherë ti ke dy rrugë.

E para ta mohosh, e dyta ta hedhësh në gjyq. Ti thuash hajde e provoje këtu në sallën e gjyqit, shpifjen që ke bërë. Asnjërën as tjetrën, po pse, sepse e kishte ndërmend të vidhte, jo 200-400, 800, 1 miliardë sa të mundej, paratë tuaja”- u shpreh Berisha.

Në përfundim të takimit të tij, ai u kërkoi të gjithë të pranishmëve që të ndikonin tek të afërmit e tyre që të votonin për Hil Currin në Fushë Arrëz.