Berisha: Qeveria flet për suksese
imagjinare, në 300 ditë 0 km rrugë

TIRANE - Ish-kryeministri Sali Berisha ka akuzuar qeverinë se në 300 ditët e para të qeverisjes nuk kanë investuar në restaurimin dhe ndërtimin e akseve rrugore, që sipas tij kanë mbetur të pambaruara që nga qeverisja e djathtë.

Duke marrë shkas nga bilanci i djeshëm i Ministrisë së Transporteve në vitin e parë të qeverisë, Berisha, përmes një postimi në rrjetin social Facebook akuzon qeverinë se po flet sipas tij për suksese imagjinare.

“Të dashur miq, dje Edi Rama dhe zëdhënësi i tij për transportin nuk ishin në gjendje t'u tregonin shqiptarëve as dhe një km rrugë apo metër urë të ndertuar apo mirëmbajtur në mbarë vendin. Në 300 ditë qeveria Rama - Meta jo vetëm që nuk nisi një projekt të ri rrugë por ata, megjithëse kishin të gjitha fondet, nuk përfunduan dot 6 km rruge Memaliaj -Tepelenë, ndonëse traseja e saj 300 ditë më parë ishte hapur në të gjithë gjatësinë e saj.” shkruan Berisha në Facebook

Duke vijuar më tej, ish-kryeministri, tregon disa akse rrugore që sipas tij nuk është vënë dorë nga qeveria aktuale, mes të cilave edhe rruga e Arbrit.

“Në 300 ditë qeveria e sukseseve imagjinare nuk përfundoi dot rrugët në përfundim e sipër si Lushnje - Berat, Butrint - Sarandë, Krume - Has. Për të mos folur për bypassin e Fierit, rrugën Qukes - Qafe Plloçe, për të cilat fondet ishin gati. Rama, në shkurt vizitoi punimet në rrugën Qafë Thanë - Pogradec dhe u zotua se rruga do përfundonte para sezonit, ndërkohë punimet kanë mbetur aty ku ishin. Këto 300 ditë janë zhdukur nga fjalori i qeverisë dhe mediave rruga e Arbrit, për të cilin lamë të gatshëm koncesionin, boshti i jugut që ishte në ndërtim e sipër.” shprehet Sali Berisha, ndërsa shton se “në këto 300 ditë pushime të plota qeveritare në punët publike nuk u ndërtua asnjë ujësjellës, kanalizim, impiant i ujerave te ndotura, te ri por as dhe nga ato që ishin në ndërtim e sipër.”



Redaksia Online
(e.c/shqiptarja.com)