TIRANË- Ish-kryeministri Sali Berisha ka komentuar sërish vizitën e kryeministrit Edi Rama në samitin e Brukselit, ku tha se ai shkoi atje si përfaqësues i Beogradit dhe presidentit Aleksandër Vuçiç, e jo për interesat e shqiptarëve.

Berisha u ndal në gjuhën e përdorur nga Rama kundrejt Bullgarisë pasi nuk hoqi veton ndaj Maqedonisë së Veriut, duke bllokuar edhe negociatat e vendit tonë. Berisha tha se atë gjuhë ndaj liderëve të BE-së mund ta përdorin vetëm diktatorët si Vladimir Putin e Aleksandër Lukashenko. Ish-kryeministri tha se Rama sulmoi Bullgarinë, një vend mike.

“Samiti i Brukselit zbuloi se Rama shkoi si përfaqësues i Vuçiç dhe Beogradit, jo i shqiptarëve, përdori një gjuhë ordineri që mund ta përdorë vetëm Lavrov, Putin e Lukashenko ndaj udhëheqësve të BE. Të gjitha i ka porosi të Beogradit. Sulmoi Bullgarinë, një vend mik, ka qenë një nga vendet aleate në Hagë kur është gjykuar pavarësia e Kosovës, i ka bërë një mbrojtje të shkëlqyer”, tha Berisha.

Ne mbledhjen e zhvilluar me kryesinë e ‘Rithemelimit’, Berisha ka komentuar edhe Bordin e Transparencës, duke thënë se i vendosin çmimet për llogari të qeverisë.

“Bordet për llogari të qeverisë dhe të oligarkëve janë shndërruar në një mekanizëm gjakpirës, të cilët rrisin çmimet jashtë çdo lloj logjike tregu. Dy ditë më parë fuçia e naftës në bursë ka qene 108 dollarë, nafta në treg ka qenë mbi 2600 lekë. Një muaj më parë kur fuçia e naftës ishte 108 dollarë, çmimi i naftës në tregun shqiptar ishte 2240 lekë. Bordet janë bërë zëdhënëse të një shfrytëzimi të egër të  qytetarëve shqiptarë”.