Kryetari i Partisë Demokratike Sali Berisha komentoi reagimin e kryeministrit Edi Rama lidhur me udhëtimin e tij të fundit privat në Zvicër ku sqaroi se shpenzimet në këto raste nuk mbulohen nga arka e shtetit.

Berisha e etiketoi Ramën si gënjeshtar ndërsa “e sfidoi” duke kërkuar ngritjen e një komisioni hetimor për 140 udhëtimet e bëra gjatë 2 viteve të fundit dhe shpenzimet me të cilat janë mbuluar.

“Unë i them se ti je një mashtrues jo dy metra i gjatë, por dy kilometra i gjatë. Dhe në qoftë se ta mban, hajde lejo të krijojmë komisionin të analizojmë 140 udhëtime me Ismailin në dispozicion, sa kenë qenë zyrtare dhe sa kanë qenë private dhe familjare. Po ti nuk ke turp dhe ti çdo fjali do nxjerrësh një mashtrim. Urdhëro në ta mban, pse nuk lejove komisionin hetimor parlamentar për 140 udhëtimet tuaja në dy vite që i kushtuan vendit 23 milionë euro”, tha Berisha.

Berisha foli gjithashtu dhe për protestat si dhe për larimin e Marjana Koçekut nga grupi parlamentar i PS. Për rrëzimin e qeverisë së Edi Ramës, Berisha i ka shpresat te largimi i të tjerë deputetëve nga PS.

“Edi Rama nuk pranon zgjidhjen, një zgjidhje tjetër paqësore siç e kërkojnë protestuesit, është largimi i të gjithë deputetëve socialistë që nuk janë të implikuar në krime dhe kjo i hap rrugën shkarkimit me mocion mosbesimi Edi Ramës. Kjo shkarkon në vend Edi Ramën dhe krijon në parlament një mundësi për plotësimin e të gjitha kërkesave, si të 5 kërkesave të tyre ashtu dhe të një liste tjetër me 20 kërkesa duke i analizuar një nga një ato”, tha Berisha.

Lajmi në përditësim...