Berlin, Steinmeier siguron Ramën
"Do ju mbështesim për statusin"

Berlini edhe një herë ka shprehur mbështetje për Shipërinë në rrugën drej BE, e ndërsa akoma nuk e ka vendosur se cfarë qëndrimi do të mbajë për statusin e vendit kandidat. Ministri i Jashtëm gjerman Frank-Walter Steinmeier gjatë një konference me kryeministrin Edi Rama tha se do të ketë mbështetjen e Gjermaninsë.

“Kjo vizitë nuk zhvillohet në një moment çfarëdo, por pikërisht përpara takimit të Ministrave të Jashtëm të BE-së në Luksemburg javën e ardhshme dhe vetëm pak ditë përpara mbledhjes së Këshillit Europian, ku  pritet të merret vendimi për çështjen e statusit të vendit kandidat për Shqipërinë. Zoti Rama ju e dini, që unë nuk mund t’jua them këtë vendim përpara këtij takimi, ai do të merret të hënën mes Ministrave të Jashtëm të Bashkimit Europian, por më lejoni t’ju siguroj që ne do të japim mbështetjen tonë për këtë vendim. Ai duhet të merret në mënyrë unanime, për t’u vendosur përfundimisht më pas në fund të muajit në Këshillin Europian”, ka thënë Steinmeier, ndërsa ka kërkuar vazhdimin e reformave.
 
Ndërkohë kryeministri Rama ka thënë se shpreson që  vendimi të jetë pozitiv, pasi vendi ka treguar rezultatet të prekshme  nga prioritetet e përcaktuara nga BE.
 
“Ne jemi shumë të qartë që procesi i integrimit është një proces i vështirë dhe është një proces që nuk mund të anashkalohet për asnjë arsye, qoftë dhe për arsyen e madhe të miqësisë me vende si Gjermania, Franca, Italia apo me radhë. Pra, ne e dimë që do të na duhet të bëjmë një nga një detyrat e shtëpisë për të arritur ditën kur do të meritojmë të bëhemi anëtar me të drejta të plota të BE”, ka thënë kryeministri Rama.