Bislimi: Kosova dhe Serbia do të propozojnë zgjidhje për çështjen e dinarit

Kryenegociatorët e Kosovës dhe Serbisë u takuan të martën në Bruksel për të diskutuar me të dërguarin e Bashkimit Evropian Miroslav Lajçak, lidhur me përdorimin e dinarit serb në Kosovë, që është shndërruar në temë mospajtimesh mes qeverisë në Prishtinë dhe diplomacisë perëndimore.

Pas takimeve të ndara, kryenegociatorët u takuan gjatë ditës me të dërguarin e Posaçëm të Bashkimit Evropian për bisedimet Kosovë – Serbi, Miroslav Lajçak, edhe në një takim trepalësh.

Zoti Lajçak shkroi në rrjetet sociale se me dy kryenegociatorët ka rënë dakord “që të vazhdojmë me këtë çështje të hënën e ardhshme, ndërsa marrëveshja do të duhet të adresohet nga udhëheqësit”.

Kryenegociatori i Kosovës, Besnik Bislimi tha pas takimit se “u dakorduam që deri të premten secila palë të sjellë propozimin e saj se si e sheh zgjidhjen afatshkurtër dhe se si të fillohet me zgjidhjen afatgjatë dhe pastaj javën tjetër të mblidhemi sërish të diskutojmë se a mund të gjejmë një hapësire që këto dy propozime të bëhen një propozim i vetëm që kishte me qenë i pranueshëm për palën e Kosovës”.

Ndërsa kryenegociatori i Serbisë, Petar Petkoviç tha se javën që vjen pritet një takim i ri, ndërsa në takimin e sotëm tha se Serbia ka kërkuar themelimin e Asociacionit të komunave me shumicë serbe.

“Për ne, formimi i Asociacionit është vendimtar sepse zgjidh plotësisht çështjen e financimit të të gjitha institucioneve tona dhe popullit serb siç parashihet me marrëveshjen e Brukselit dhe marrëveshjet e tjera”, tha zoti Petkoviç.

Kjo është hera e parë që zyrtarë të qeverisë po marrin pjesë në diskutime për çështjen e dinarit serb pasi deri më tash kanë refuzuar me arsyetimin se kjo nuk është temë e dialogut që zhvillohet në Bruksel. Në takimin e muajit të kaluar nga Kosova kishin marrë pjesë zyrtarë të Bankës Qendrore të Kosovës.

Takimet në Bruksel pasuan rregulloren e kësaj banke, sipas së cilës euroja është valuta e vetme që mund të përdoret për pagesa të gatshme në Kosovë. Rregullorja që ka hyrë në fuqi me një shkurt, nxiti reagimin e zemëruar të Beogradit, dhe shqetësimet e diplomacisë perëndimore për ndikimin e saj në jetën e serbëve të Kosovës që vazhdojnë të mbështeten financiarisht nga Beogradi si dhe në tensionet ndërmjet palëve.

Diplomatët i kanë bërë thirrje qeverisë së Kosovës të pezullojë rregulloren e Bankës Qendrore dhe t’u jepet kohë qytetarëve të prekur për t’u përshtatur me situatën e re.

Shtetet e Bashkuara kanë theksuar se mungesa e bashkërendimit nga qeveria e Kosovës lidhur me këtë çështje ka ndikuar në cilësinë e partneritetit ndërmjet të dy qeverive dhe kanë paralajmëruar Prishtinën se mospajtimet pengojnë angazhimin e tyre për të ndihmuar përparimin e Kosovës drejt integrimeve euro-atlantike.

Shefi i politikës së Jashtme të Bashkimit Evropian, Josep Borrell, paralajmëroi të hënën shtimin e trysnisë mbi Kosovën dhe Serbinë për zbatimin e marrëveshjes së arritur një vit më parë për normalizimin e marrëdhënieve ndërmjet tyre

Me 18 mars në Ohër ata u pajtuan për udhërrëfyesin e zbatimit të marrëveshjes e cila kërkon marrëdhënie të mira fqinjësore, njohje të dokumenteve dhe simboleve dhe respektim të sovranitetit dhe tërësisë tokësore të njëra-tjetrës. Ajo kërkon që palët të mos pengojnë njëra-tjetrën në proceset integruese, por nuk kërkon njohje të ndërsjellë. Plani parasheh edhe përmbushjen e të gjitha marrëveshjeve të arritura më parë në bisedimet e ndërmjetësuara nga Bashkimi Evropian.

Marrëveshja ishte mirëpritur nga diplomacia perëndimore dhe pati një shkallë optimizmi se zbatimi i saj do të fillojë menjëherë, por, kjo nuk ndodhi dhe palët kaluan periudha tensionesh të larta që kulmuan me 24 shtator kur një polic i Kosovës u vra gjatë një sulmi serbësh të armatosur./ VOA

K.M//Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

  • Sondazhi i ditës:

    Alibeaj iku nga grupi PD, çfarë duhet të bëjnë deputetët e tjerë pro Bashës?



×

Lajmi i fundit

Euro 2024/ Kombëtarja udhëton sot në Dusseldorf, Sylvinho ndryshon formacionin! ‘Pushtim’ kuqezi në stadium

Euro 2024/ Kombëtarja udhëton sot në Dusseldorf, Sylvinho ndryshon formacionin! ‘Pushtim’ kuqezi në stadium