Nga Asambleja e PS në Lushnjë, kryeministri Edi Rama u kujdes të nënvizojë edhe njëherë se nuk ka bllokim negociatash me BE. Shefi i qeverisë e quajti një gënjeshtër me 7 bishta deklaratat e opozitës se BE ka bllokuar negociatat me vendin tonë, duke shtuar se gjithçka po ecën sipas planit të dakordësuar me Unionin.

“Përveç atyre që na kanë dhënë votën dhe mbështetjen më 11 maj, askush tjetër nuk na e fal dhe nuk do t’ia dijë fare për atë fitore që ne morëm, në kuptimin e respektit dhe detyrave, por do vetëm sherr, shamatë, baltë dhe llum. E gjithë kjo bie edhe mbi ata që na kanë dhënë votën, sepse të dëgjosh përditë e përnatë vetëm keq dhe zi, sigurisht që diçka ndodh në aspektin e motivimit.

Ne nuk kemi një mundësi të korrigjojmë të tjerët, vetëm korrigjojmë veten dhe punën tonë, dhe pjesë e kësaj është edhe rritja e komunikimit me njerëzit. U mbush gjithë hapësira e mediave me një vorbull për bllokimin e negociatave, një gënjeshtër me shtatë bishta. Ne po ecim sipas planit të BE-së. E nisëm nga fundi i bishtit të kavallit dhe jemi përpara bashkë me Malin e Zi”, tha Rama.

Nuk ka ndodhur kurrë, tha Rama, që partitë politike të shkojnë nëpër kryeqytetet e Europës dhe të bëjnë copash vendin e tyre e ta sakatojnë në gjuhë të huaj. Kryesocialisti ironizoi edhe opozitën duke thënë se “ata i kanë gjithmonë pas”, dhe se i gënjen mendja se do ta mundin PS duke lehur në Bruskel, apo duke dalë në televizor jashtë shtetit.

“Nuk ka ndodhu që partitë të shkojnë nëpër kryeqytetet e Europës dhe të bëjnë copash vendin e tyre, këtë e bëjnë vetëm ata, s’mund të themi që i kem përball, se ata i kemi mbrapa, gjithmonë e më mbrapa, por nuk dalin njerëzit kështu nga vetja të sakatojnë vendin e tyre në gjuhë të huaj. Nuk e di për çfarë, i gënjen mendja se do na mundin ne këtu duke dalë në televizion jashtë shtetit, duke lehur në Bruksel, do na ulin ne dhe do ngrenë veten. Sa më shumë ta bëjnë këtë gjë, aq më shumë do zhyten, se jo të gjithë janë të lumtur që Shqipëria po bën sukses”, tha Rama.

Ndërkohë nuk ka vonuar as përgjigja e kreut të grupit parlamentar të Partisë Demokratike, Gazment Bardhi, i cili në një status shkruar se procesi i integrimit në BE është bllokuar dhe kjo për shkak të qëndrimit që qeveria ka mbajtur për çështjen e Belinda Ballukut.

Rendit zhvillimet sipas orarit:
Ora 18:20
Bardhi i përgjigjet Ramës: Mjaft u talle me shqiptarët, negociatat me BE janë bllokuar prej Belinda Ballukut

1775482090_1699822510gazmentbardhi.jpg

Kreu i grupit parlamentar të Partisë Demokratike Gazment Bardhi i është përgjigjur deklaratave të kryeministrit Edi Rama, i cili tha se lajmi për ‘bllokimin e negociatave me BE” janë një gënjeshtër e opozitës.

Bardhi akuzon Ramën se ka penguar procesin e integrimit në BE për shkak të qëndrimeve të tij ndaj SPAK dhe mbështetjes për Belinda Ballukun. Sipas Bardhit, negociatat me BE-në janë vonuar dhe vendit i janë shtuar kushte, për shkak të mungesës së besimit te sundimi i ligjit. Ai thekson gjithashtu shqetësimet e vendeve anëtare për çështjen “Balluku” dhe skandalin e AKSHI, duke kërkuar më shumë transparencë nga qeveria.

Reagimi i plotë i Gazment Bardhit

Edi Rama mjaft i gënjeve dhe u talle me shqiptarët! Po të mos ishte vota jote kundër SPAK-ut dhe pro Belinda Ballukut, Shqipëria sot do të kishte nisur mbylljen e kapitujve për negociatat e anëtarësimit. Kjo s’po ndodh, jo për faj të opozitës, por se nuk ua shet dot sapunin për djathë vendeve anëtare të BE-së. Sot jemi në kushtet kur Shqipërisë po i shtohen kushtet në negociatat për anëtarësim, sepse, kryeministri/avokat i Belinda Ballukut dhe kryeministri/ortak i Ergys Agasit ka thyer në mes besimin e partnerëve për sundimin e shtetit të së drejtës dhe barazinë para ligjit.

Që çështja “Balluku” ishte një test për Shqipërinë në rrugën e integrimit, nuk e tha opozita në Tiranë. E tha Europa! Dhe sot, jemi me të paktën 4 muaj vonesë me negociatat, jo për faj të opozitës, siç mashtron paturpësisht Edi Rama, por se ai zgjodhi Belindën, pra karrigen e tij, para integrimit europian dhe interesit të shqiptarëve.

Për dy çështje kryesore kanë interes vendet anëtare:

1. Korrupsionin e Belinda Ballukut.

2. Skandalin e AKSHI-t.

Për të dyja këto, deri tani, janë dërguar 49 pyetje dhe përgjigjet e dhëna nga Komisioni Europian akoma nuk i kanë bindur vendet anëtare që të hapin dritën jeshile.

Pse nuk bën transparencë Edi Rama për këtë fazë delikate të procesit të negociatave, por vazhdon me retorikën e zakonshme, të mbushur me urrejtje dhe shpifje ndaj opozitës?

Pse nuk u tregon shqiptarëve se në mbledhjen e fundit të datës 9 Prill, 7 shtete anëtare kanë deklaruar se do të dërgojnë propozime të tjera shtesë për Shqipërinë?

Pse nuk u thotë Edi Rama shqiptarëve se 4 shtete anëtare, me shqetësim të shtuar pas votës së tij në mbrojtje të Ballukut, kanë deklaruar se do t’i miratojnë piketat e ndërmjetme, (detyrat që duhen bërë gjatë negociatave), por vetëm me kusht që tek piketat mbyllëse (kriteret finale për të mbyllur një kapitull) të vendosen kushte të përforcuara dhe më të gjera për Shqipërinë?

Besoj që kujtdo i kujtohet qendrimi i Edi Ramës në fushatë se “nuk mund të humbim as edhe një ditë kohë me negociatat, sepse dera e BE-së mund të mbyllet”. Sot, ka vetëm një përgjegjës për vonesën e negociatave: Edi Rama. Sot, ka vetëm 1 të vërtetë për integrimin: Me votën kundër SPAK-ut për rastin “Balluku”, Edi Rama, do t’i kushtojë Shqipërisë jo një ditë e dy, por të paktën 6 muaj vonesë me integrimin!

K.B/Shqiptarja.com