Boçi: Iniciativa e Ballës për
median fsheh interesa klienteliste

TIRANE - Demokratët do ta kundërshtojnë më forcë propozimin e deputetit socialist Taulant Balla për heqjen e nenit 62 të ligjit të Medias, ndryshim ky që i hap rrugën krijimin të monopoleve mediatilke. Deputeti demokrat i Komisionit parlamentar të Medias Luçiano Boçi thotë se pas kësaj iniciative fshihen interesa klienteliste të qeverisë si dhe krijon terren për krijimin e megamonopoleve mediatike. Kjo frikë është e dukshme në kushtet kur kërkohet të hiqet tërësisht neni 62 i cili parashikon qartë që një aksioner në media nuk mund të ketë më shumë se 40 përqind të aksioneve si dhe parashikon që një televizion nuk mund të ketë më shumë se 30 përqind të reklamave.

Demokratët jo vetëm që do ta kundërshtojnë këtë ligj, por po konsultohen me institucionet ndërkombëtare që monitorojnë mediat dhe zbatimin e ligjit në këtë drejtim. Luçiano Boçi thotë se propozimi i për heqjen e këtij ligji për miratim në mënyrë të përshpejtuar lidhet me fushatën elektorale. Sipas tij projekti ka të bëjë më krijimin e hapsirave për televizionet kombëtare në mbështetje të fushatës së qeverisë.

Ndërkaq pavarësisht insistimit për të marrë një qendrim nga propozuesi i këtij ndryshimi Taulant Balla, ky i fundit refuzoi të shpjegojë iniciativën që ka depozituar tashmë në Kuvendin e Shqipërisë.
 
Nënkryetari i grupit të Partisë Socialiste depozitoi dy ditë më parë në Kuvend ndryshimet ligjore në ligjin për funksionimin e medias përmes të cilit kërkon heqjen e nenit 62 të tij i cili parashikon rregullimin e pronësisë në transmetimet audio dhe audiovizive tokësore dhe përmes rregullave të përcaktuara në këtë nen garantohet konkurrenca ne treg dhe mos lejimi i monopoleve dhe oligopoleve.

Redaksia Online
(Gre.M/Shqiptarja.com)