POP 5

Lajmet më të lexuara të 5 minutave të fundit

Kosova & Rajoni

Borrell në samitin e BE: Prishtina dhe Beogradi kanë marrë tekstin e planit franko-gjerman! Koha për diskutime serioze mes Kosovës dhe Serbisë

Përfaqësuesi i lartë i Bashkimit Evropian për politikë të jashtme dhe siguri, Josep Borrell, konfirmoi se Prishtina dhe Beogradi kanë marrë tekstin e përditësuar të planit franko-gjerman dhe duhet të futen në diskutime serioze për dialogun.

Në samitin e BE në Tiranë, përfaqësuesi i lartë i Bashkimit Evropian për politikë të jashtme dhe siguri, Josep Borrell, konfirmoi se Prishtina dhe Beogradi kanë marrë tekstin e përditësuar të planit franko-gjerman dhe duhet të futen në diskutime serioze për dialogun.

"Edhe për dialogun mes Prishtinës dhe Beogradit, është moment i rëndësishëm. Debati ka përfunduar, tani duhet të përfshihen në dialog. Me propozimet që kemi vënë në tavolinë dhe me strategjitë e ideuara nga Gjermania dhe Franca, te teksti i fundit u është dërguar dje Beogradit dhe Kosovës dhe duhet të nisin diskutimet serioze se është një moment tepër i rëndësishëm", tha Borrell.

Plani i BE-së, i cili mbështetet nga Gjermania, Franca dhe Shtetet e Bashkuara, është pjesë e dialogut për normalizimin e marrëdhënieve ndërmjet Kosovës dhe Serbisë. Ndonëse ka kohë që përflitet, për përmbajtjen e tij nuk ka informacione zyrtare.

Në fjalën e tij para mediave, Borell përmendi krizën energjetike të shkaktuar nga lufta si dhe sulmet kibernetike ndaj Shqipërisë duke thënë se BE është e përkushtuar që të mbështesë rajonin.

"Kjo është një ditë e rëndësishme për Ballkanin Perëndimor. Është samiti i parë në BE që zë vend në Ballkanin Perëndimor. Jemi tejet të përkushtuar ndaj rajonit për ta mbështetur e për tu përballur me pasojat e luftës. Çmimet e energjisë janë rritur shumë. Nga ana tjetër, Shqipëria është goditur nga sulmet kibernetike. I kam ofruar mbështetje kryeministrit Edi Rama për t’u përballur me sulmet kibernetike. Do ofrojmë mbështetje në Bosnje për çminimin, 10 mln euro për fushatë çminimi.", tha Borell.

Rendit zhvillimet sipas orarit:
Ora 15:11
Bislimi: Nuk mund t'i publikoj detajet e planit franko-gjerman

1670335537_bvesnik.PNG

Zëvendëskryeministri i Kosovës, Besnik Bislimi, ka thënë se nuk mund ta bëjë publike përmbajtjen e planit franko-gjerman për arsye se kështu janë marrë vesh palët në dialog.

Kështu tha ai më 6 dhjetor para Komisionit për punë të jashtme dhe diasporë, ku raportoi për dialogun Kosovës-Serbi.

Ai tha se ka një dakordim mes propozuesve të planit [BE-së, Francës dhe Gjermanisë], dhe në anën tjetër të kryeministrit të Kosovës, Albin Kurti, dhe presidentit serb, Aleksandar Vuçiç, që përmbajtja e tekstit të mbahet larg publikut në mënyrë që “diskutimi të jetë sa më konstruktiv”.

Plani i BE-së, i cili mbështetet nga Gjermania, Franca dhe Shtetet e Bashkuara, është pjesë e dialogut për normalizimin e marrëdhënieve ndërmjet Kosovës dhe Serbisë.

Ndonëse ka kohë që përflitet, për përmbajtjen e tij nuk ka informacione zyrtare.

I pyetur nga deputetët e komisionit se pse Kosova është pajtuar që ky proces të jetë kaq i mbyllur dhe me kaq pak informata për publikun, Bislimi tha se ka qenë kryeministri Kurti në takimin me ndërmjetësuesit ku është arritur ky dakordim, por se nuk ka pasur mundësi zgjedhje mes “opsionit të hapur ose opsionit të mbyllur”, ngase diskrecioni ka qenë kërkesë eksplicite në tavolinë.

Ai tha se edhe pse përmbajtja e të ashtuquajturit plani franko-gjerman nuk është bërë publike, lideri i Aleancës për Ardhmërinë e Kosovës, Ramush Haradinaj e ka lexuar atë, dhe ishte udhëzuar që përmbajtjen e tij ta ndante edhe me dy liderët tjerë të partive opozitare, të cilët nuk i kanë shkuar Kurtit në takim.

Pas takimit të 21 tetorit, Haradinaj kishte thënë se me Kurtin ka qenë përmbajtësor, por nuk i ishte përgjigjur gazetarëve nëse në takim ishte diskutuar për të ashtuquajturin plani franko-gjerman.

Përfaqësuesi i lartë i Bashkimit Evropian për politikë të jashtme dhe siguri, Josep Borrell, konfirmoi më herët gjatë ditës se Prishtina dhe Beogradi kanë marrë tekstin e përditësuar të këtij plani.

Bislmi tha se Kosova e ka pranuar "draftin e përditësuar, por jo draftin final".

Më herët, zyrtarë në Kosovë e kanë cilësuar planin e ashtuquajtur franko-gjerman si "bazë të mirë" për diskutime të mëtejme me Serbinë, ndërsa në Serbi kanë thënë se plani nuk është në favor të saj.

Presidenti serb, Aleksandar Vuçiq, ka thënë se plani parasheh që Serbia të mos e pengojë Kosovën nga anëtarësimi në organizata ndërkombëtare, përfshirë Kombet e Bashkuara, në këmbim të përshpejtimit të anëtarësimit të saj në BE.

Bislimi tha se edhe kur Vuçiqi që ka thënë se ka një plan franko-gjerman ka mbështetjen e SHBA-së dhe Turqisë është konsideruar nga ndërmjetësuesit se e ka shkelur marrëveshjen për konfidencialitet.

Portali informativ, Euractiv, publikoi më 9 nëntor një dokument, për të cilin tha se është draft i propozimit franko-gjerman.

Dokumenti i publikuar përmban 9 nene. Fillon me pajtim për marrëdhënie normale mes Kosovës dhe Serbisë, angazhimin për integrim në BE, zgjidhjen e mospajtimeve dhe respektimin e integritetit territorial, respektimin e subjektivitetit të njëra-tjetrës, respektimin e ndërsjellë të juridiksionit, zotimin për rritje të bashkëpunimit në fusha të ndryshme - përfshirë ekonominë, shkencën, gjyqësorin, fushën e mbrojtjes etj. Plani, siç thuhet, parasheh edhe shkëmbimin e misioneve të përhershme, si dhe pajtimin e palëve që kjo marrëveshje nuk ndikon në marrëveshjet e arritura më parë.

Autenticiteti i këtij dokumenti nuk ka mundur të verifikohet në mënyrë të pavarur nga Radio Evropa e Lirë.

Kosova dhe Serbia kanë nisur dialogun për normalizimin e marrëdhënieve qysh në vitin 2011, nën ndërmjetësimin e BE-së.

Palët kanë arritur dhjetëra marrëveshje për këtë qëllim, por zbatimi i shumicës së tyre ka ngecur.

Përfaqësuesi i BE-së në këtë dialog, Mirosllav Lajçak, tha të martën në Prishtinë se zyrtarët në Bruksel janë duke punuar që një takim i ri mes Kurtit dhe Vuçiqit të mbahet brenda javësh./REL

S.S/Shqiptarja.com

  • Sondazhi i ditës:
    20 Nëntor, 13:18

    Vrasja e 14 vjeçarit, çfarë duhet të bëjë Shqipëria me TikTok e Snap Chat?

Lajme të tjera



×

Lajmi i fundit

Shtetet e pasura zotohen të japin për 300 miliardë dollarë në vit për vendet në zhvillim që përballen me efektin e ndryshimeve klimatike

Shtetet e pasura zotohen të japin për 300 miliardë dollarë në vit për vendet në zhvillim që përballen me efektin e ndryshimeve klimatike

24 Nëntor, 15:33