Sulmuesi i kombëtares së Iranit, Mehdi Taremi, ka zbuluar detaje nga takimi që lojtarët iranianë zhvilluan me presidentin e FIFA-s, Gianni Infantino, pas problemeve me vizat që kanë prekur disa anëtarë të delegacionit iranian gjatë Kupës së Botës 2026.

Sipas Taremit, futbollistët iranianë kërkuan sqarime nga kreu i futbollit botëror për faktin se disa zyrtarë të ekipit kombëtar nuk ishin lejuar të hynin në Shtetet e Bashkuara të Amerikës.

Mediat ndërkombëtare publikuan më pas një regjistrim të fjalimit të Infantinos në dhomën e zhveshjes së Iranit, ku ai u përpoq të motivonte skuadrën.

“E di çfarë po kaloni dhe e kuptoj situatën. Por ju jeni më të fortë se çdo pengesë. Keni bashkuar botën dhe ju falenderoj për këtë. Në dy ndeshjet e mbetura do ta bëni të gjithë botën krenare. Nëse trajneri ka nevojë për një sulmues, unë do të vij të luaj me ju në ndeshjen e ardhshme”, u shpreh Infantino.

Taremi konfirmoi se mesazhi i presidentit të FIFA-s ishte i qartë, organizata do të angazhohet për të ndihmuar ekipin iranian.

“Ai na tha se do të na ndihmojë. Ky është vetëm fillimi i Kupës së Botës dhe ne besojmë në atë që ai na premtoi”, deklaroi sulmuesi iranian.

Sipas informacioneve të publikuara, Infantino i siguroi drejtuesit dhe lojtarët e Iranit se do të bënte gjithçka që ishte në kompetencat e tij për t’u mundësuar zyrtarëve iranianë, të cilëve u ishte refuzuar më parë viza, të udhëtonin drejt SHBA-së dhe të ishin pranë skuadrës në ndeshjet e mbetura të fazës së grupeve.

Kjo situatë vjen në një moment tensionesh politike dhe bombardimeve që SHBA dhe Izraeli ndërmorën në Iran. Kujtojmë se deri në momentet e fundit pjesëmarrja e Iranit në grupet e Kupës së Botës ishte në dyshim, pasi drejtuesit e futbollit në këtë vend kishin dyshime për sigurinë.

Për të lexuar lajme të tjera nga Botërori KLIKONI KËTU.

Për të parë rezultatet e ndeshjeve të Botërorit KLIKONI KËTU.