POP 5

Lajmet më të lexuara të 5 minutave të fundit

Kultura

Botohet vepra ‘Tinka Kurti, ditari i një bashkëshorti’ , zbardhen copëza të rrëfimit të saj, sakrificat për të marrë rolin që i hapi rrugët e artit! Aktorja: S'e kisha menduar që do bënit këtë mrekulli

“Ditari i një bashkëshorti’ është vepra e veçantë e përmbledhur me kujtime e rrëfime të panjohura për jetën dhe veprën e aktores së madhe shqiptare Tinka Kurti, që u promovua për lexuesin ku numërohen 40 vitet e karrierës së saj.

TIRANË- 40 vite të përmbledhura në një ditar të rrallë, me kujtime e rrëfime të panjohura për jetën dhe veprën e aktores së madhe Tinka Kurti janë sjellë të përmbledhur në një libër “Ditari i një bashkëshorti” të Anila Memës.

Vepra vjen si një botim i veçantë mes ditarit dhe albumit fotografik, mbajtur nga i bashkëshorti i aktores Palokë Kurti për jetën skenike të aktores.

 “E ke ndriçuar atë rrugë! Sot je një grua e nderuar dhe përulemi me shumë respect para teje. Na ke frymëzuar të gjithëve”, tha Veliaj.

“Të ndash kaq shumë nga vetvetja dhe ta bësh këtë në mënyrë publike, përtej roleve që ke bërë më parë, në çdo moment që ke qenë afër publikut , do guxim”, tha Margariti.

Realizimin e një ditari të tillë aktorja Kurti e quajti një mrekulli për të cilën falenderoi të gjithë kontribuesit.

 “Ju falenderoj për këtë mrekulli që keni bërë! Nuk e kisha menduar kurrë se do të bënit një mrekulli kaq të madhe””, tha ajo.

Aktorja Tinka Kurti u lind më 17 dhjetor në 1932 në Sarajevë dhe që atëherë ajo ruan një karrierë të gjatë artistike, ku në 60 vite numëron mbi 50 filma artistike dhe mbi 150 shfaqje në skenën teatrore .

Rendit zhvillimet sipas orarit:
Ora 17:41
‘Jepini dorën! Kjo do të jetë artistja e ardhshme e Shqipërisë’, pjesë nga libri i Tinka Kurtit: Mendimi i Mehmet Shehut kur më pa në rolin e Marianës

Në ditarin e Tinka Kurti, aktorja ka shkruar detaje se si është ndjerë kur ka marrë një rol të rëndësihëm në veprën “Kopraci” nga Molieri me regji të Lec Shllaku. Ajo ka treguar sakrificat për të marrë atë rol, madje ka zbuluar edhe se si ka reaguar Mehmet Shehu, që e ka vlerësuar për këtë rol që më pas i shërbeu si trampolinë në karrierën e saj të artë.

Pjesë nga librit: 

1- “Kopraci” nga Molieri
Regjia: Lec Shllaku
Shfaqet për herë të parë në datën 20.II.1952.

Ka interpretuar rolin e Marjanës.
Mendime të Tinkës për rolin: Ndamja e roleve të “Kopracit”, ishte një ngjarje me randësi për Teatrin tonë. Unë hala, në atë kohë isha gjysmë profesioniste dhe as që mendojsha se do të më besonte regjisori ndonjë rol, aq më tepër se në këtë periudhë vihej paralel drama “6 Dashnorët”. Lec Shllaku, regjisori, u justifikue me faktin se; “Nuk të dhashë rol te “Kopraci”, se më duheshe për heroinën te drama tjetër”, shfaqje e cila nuk pati fare sukses. Ndërsa komedia e Molierit, tronditi skenën, me lojën e mrekullueshme të artistit Zef Jubani, aq sa kur e pa shoku Enver, shfaqjen, në një takim me punonjësit e fermentimit tha: “Si mundet të ketë në Shkodër perçe, Shkodra, vendi, ku lot kaq bukur Zef Jubani – Harpagonin?!” Unë, pata fatin të los me këtë partner, tue dublue rolin e Marianës, por në kondita shumë të vështira.

Trupa e teatrit do të merrej për një turne Durrës – Tiranë dhe mue më urdhëruen të shkojsha në këtë turne, megjithëse kisha djalin 4 muajsh. Nuk ishte këtu e keqja, pse ato veprojshin jashtë ligjit, por do të lossha një rol shërbyeseje pa asnjë fjalë e për rolin e Marjanës, do të merrshin aktoren e Durrësit, Vera Vreshtanji, e cila e kishte punue këtë rol, kur ishte në teatrin tonë. Kjo ishte shumë fyese për mue, të merrej aktorja nga Durrësi, tue qenë unë. Insistova, që rolin e Marianës do ta los unë në turne. Na ndanin vetëm 24 orë nga nisja dhe mendoni se në çfarë gjendje isha unë, të përgatitsha fëmijën 4 muajsh, veten apo rolin.

Kështu që nuk fjeta gjithë natën. E dhashë premierën në qytetin e Durrësit, por nuk kam dëshirë ta kujtoj atë shfaqje, pasi edhe pranimi i regjisorit për ta luejt unë rolin e Marianës ishte tendencioz për mue. Ai nuk kishte fare besim tek unë. Sipas tij, unë isha një partnere e dobët për një aktor aq të madh si Zef Jubani. Por qe pikërisht ky rol, shumë ma vonë, që më hapi rrugën e artit. Shoku Mehmet, kur erdhi me pa shfaqjen e çmoi shumë punën e bukur të Teatrit, punën e Zef Jubanit, e në mënyrë të veçantë edhe mue. Ai kishte pyet njerëzit që e shoqërojshin:

– Kush asht’ kjo aktore?
– Asht’ nji aktore e re, e kemi aktivizue ta provojmë, – u kishin përgjigj ato.
Ndërkohë Mehmet Shehu ishte shpreh tekstualisht kështu:
-Jepini dorën! Kjo do të jetë artistja e ardhshme e Shqipërisë.

Fjala e tij mori dhen’ dhe po aq shpejt ndërroj edhe opinioni për mue. Sa e çmueshme ishte për mue kjo fjalë.
Sikur të mos e shifte këtë shfaqje shoku Mehmet dhe mue në këtë rol (se kjo ka randësi), unë ndoshta as sot, nuk do të isha aktore. Unë këtu fola shkurt, por nesër do të shkruej për jetën time. Pikërisht në këtë periudhë do ndalesha shumë, sepse me këtë çast u hap një rrugë e re në karrierën time. Një orë para se të fliteshe kjo gja, unë isha një aktore e zakonshme. Por dhjetë minuta mbasi foli ai, unë isha një aktore e madhe. Edhe ishin pikërisht ata persona, që një orë përpara ishin shpreh “se Tinka asht’ një aktore diletante që po e provojmë”. Sa shumë due me thanë, por tash për tash po e la me kaq.

B.K./Shqiptarja.com

B.K./Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

  • Sondazhi i ditës:

    Mendoni se lufta ndaj nëndeklarimit të pagave do rrisë ndjeshëm pensionet?

Lajme të tjera



×

Lajmi i fundit

Përmbytjet ‘apokaliptike në Spanjë, shkon në 213 numri i viktimave

Përmbytjet ‘apokaliptike në Spanjë, shkon në 213 numri i viktimave

2 Nëntor, 22:53