Pavarësisht se Krichbaum, i përket CDU-së së Merkelit, kjo parti sipas tij e ka një kryetare, e cila të hënën do të takohet me kryeministrin shqiptar për t’i përcjellë një qëndrim zyrtar.
7 kushtet e artikuluara nga deputeti gjerman, nuk iu përcollën sipas Braçes as Ilir Metës, që ndodhet prej ditës në vizitë zyrtare në Bundestag.
"Kryetari i Kuvendit është në Bundestag, flet atje, komunikon me ata njerëz, merr mbështetjen e tij nga Bundestagu dhe ju bën përshtypje një njeri që vjen këtu dhe në emër të tij personal del dhe bën një deklaratë atje.
Me ç'di unë zonja Merkel është jo vetëm kryetare e partisë së saj por është edhe kancelare e Gjermanisë dhe me ç'po lexoj edhe kandidate për një mandat të ri. Mos merremi me njerëz kaq të vegjël në raport me ata që përfaqësojnë institucionalisht Gjermaninë, qeverinë gjermane, parlamentin gjerman e çdo gjë tjetër."- deklaroi Braçe.
Ndërsa për kryetaren e kom të integrimit Majlinda Bregu, nuk ka asgjë të re në atë që tha Krichbaum, zgjedhjet e dekriminalizimi ishin kushte të padiskutueshme paracaktimit të një date për hapjen e negociatave, e cila sipas gjermanit do jetë vetëm në fund të 2018-s.
"Përveç atyre që nuk kuptojnë fare çfarë do të thotë procesi i negociatave të anëtarësimit në Bashkimin Europian , mund të prisnin që në dhjetor të kishte një konfirmim për datë çelje negociatash para zhvillimit të zgjedhjeve parlamentare. Për të mbërritur tek zgjedhjet ne nuk mund të shkojmë pa zbatuar ligjin e dekriminalizimit.
Të gjitha këto dhe zbërthimi i 5 prioriteteve të thëna dje nuk janë asgjë më shumë se sa ajo që ishte në progres raport. Por që dëshmojnë edhe njëherë se në vendimin që do të jetë në Këshill në dhjetor ky do të jetë humori ose qëndrimi i vendeve anëtare kryesisht. Rrugë të mbarë kryeministrit në Gjermani të hënën, do ta shoh bashkë me ju në televizor"- deklaroi Bregu.
Por më i shqetësuar se për qëndrimin e gjermanit, Erjon Braçe shprehet për qëndrimin e PD-së.
"Gjithçka është thënë dje është tezë , qëndrim, betejë, luftë kundër Shqipërisë e Lulzim Bashës. Shqetësimi im nuk lidhet me asnjë të huaj që vjen në Shqipëri, bën një deklaratë dhe largohet. Shqetësimi im lidhet drejtpërdrejt me këta shqiptarë, që me thënë të drejtën, dje në kuvend u fol dhe për raca, raca më e poshtër antishqiptare".- deklaroi Braçe.
Të enjten deputeti gjerman Gunther Krichbaum deklaroi se grupimi i tij politik do t’i rekomandojë qeverisë federale që të mos miratojë çeljen e negociatave derisa të përmbushen 7 kushte.
Sipas tij, Shqipëria do duhet të presë deri në vjeshtën e vitit 2018 kur të publikohet raporti i ardhshëm i Komisionit Europian.
(er.nu/shqiptarja.com)
![](https://www.shqiptarja.com/template/img/sh_logo1.png)