Braimllari: Qeveria po thellon skandalin te Unaza e Re, 25 mln euro për sheshin e ndërtimit për Taulant Ballën

TIRANË- Ish-deputeti i LSI Endrit Braimllari ka akuzuar ditën e sotme kryeministrin Edi Rama se po përpiqet të shpenzojë rreth 25 milionë euro nga taksat e shqiptarëve për rehabilitimin e Lumit Lana me synim zgjerimin e sheshit të ndërtimit për Taulant Ballën.  Braimllari tha se Rama kërkon të shembë shtëpitë e banorëve duke mos i dëmshpërblyer ato me argumentin se nuk ka para.

"Të nderuar qytetarë, qeveria në ikje dhe grabitqare vazhdon dhe thellon skandalin e saj korruptiv. Ky skandal është më i madhi i kësaj qeverie dhe këtij parlamenti noter të qeverisë. Është vazhdimësia e skandalit korruptiv të Edi Ramës për projektin e Unazës së Re.

Edi Rama pas 40 milionë euro që kërkonte të rrëmbente tek projekti i unazës së re, në kurriz të 1300 familjeve të cilat me mund dhe djersë për 30 vite kanë arritur të ndërtojnë shtëpitë e tyre duke i paguar çdo taksë shtetit shqiptar. Sot, kërkon të kalojë në parlament një kontratë për grabitjen e radhës në Unazën e Re dhe konkretisht në rehabilitimin e shtratit të Lumit Lana.

Edi Rama kërkon të shpenzojë nga taksat e shqiptarëve rreth 25 milionë euro të tjera nga të cilat 8 milionë do të merren kredi për të shembur shtëpitë e banorëve të Unazës së Rë që shtrihen pranë lumit Lana me synim zgjerimin e sheshit të ndërtimit për Taulant Ballën.

Edi Rama kërkon të shembë shtëpitë e banorëve të Unazës së Re duke mos i dëmshpërblyer ato, me argumentin se nuk ka para.

Por ndërkohë, merr 8 milionë euro kredi për të prishur shtëpitë e qytetarëve, që nëse ne do të kishim një kryeministër të përgjegjshëm, serioz dhe jo hajdut këto para shumë mirë mund të shkonin për dëmshpërblimin e banorëve të Unazës së Re.

Është e qartë që për Edi Ramën dhe qeverinë e tij ilegjitime qytetarët janë të fundit. Oligarkët, krimi i organizuar dhe hajdutëria e tij qeveritare janë të parët"u shpreh Braimllari.

TAG:
• endrit braimllari