Brukseli: Të përfundojë reforma

BRUKSEL - Komisioneri për Zgjerim në BE, Stefan Fyle i drejtohet sërish politikës shqiptare se, realizimi i reformave të jetë kontribut i të gjitha palëve.

“Më lejoni të nënvizoj rëndësinë që ka kontributi i të gjithë aktorëve në realizimin e reformave, vazhdimi i bashkëpunimit gjithëpërfshirës dhe konstruktiv, si dhe dialogu ndërmjet qeverisë dhe opozitës. Komisioni është i gatshëm të japë mbështetje dhe orientime për këto përpjekje të rëndësishme të Shqipërisë, të cilat bëhen edhe më të rëndësishme në këtë kohë kur i gjithë rajoni po ecën përpara”, tha Fyle pas takimit me ministren e integrimit, Majlinda Bregu.
Deklarata është publikuar në faqen zyrtare të Komisionit Europian. Sipas kësaj deklarate, Fyle ka nxitur mbylljen e reformës zgjedhore.


SOCIALISTËT NË KOMISIONIN EUROPIAN
Zëvendëskryetari i delegacionit për Ballkanin, Libor Roucek i grupimit socialistdemokrat ve në pah progreset që janë arritur javët e fundit, duke u ndalur veçanërisht tek rëndësia e reformës zgjedhore.
“Zhvillimet janë pozitive dhe mund të themi se janë bërë shumë progrese. Por ne jemi ndalur gjerësisht tek reforma zgjedhore. Jo lidhr me detajet e zgjedhjeve, pasi kjo nuk është detyra jonë. Por ajo që është e rëndësishme për ne dhe që u themi forcave politike në Shqipëri është që kodi zgjedhor dhe proçedurat të jenë në përputhje me rekomandimet e OSBE/ODHIR. Pasi na pëlqen apo jo, Shqipëria nuk do të gjykohet për faktin se kush do fitojë apo kush do ti humbi zgjedhjet e 2013, por se sa do ti plotësojë vendi standartet gjatë zgjedjeve në 2013”, u shpreh Roucek në prononcimin e tij për mediat shqiptare në Bruksel.
Në takimin që ministrja Bregu ka patur me raportuesin për Shqipërinë, Nikolaos Chountis, është vënë në pah vullneti i Parlamentit Europian për të përfshirë në rezolutën për Shqipërinë të gjitha arritjet që Shqipëria mund të korrë deri në tetor.

(aq/shqiptarja.com)

TAG:
• OSBE