Bulqizë, 200 banorë të Godvisë pa ambulancë! Të moshuarit: S’kemi ku matim as tensionin, infermieri u largua para 6 muajsh

Kjo godinë e rrënuar ka shërbyer si ambulancë shëndetësore për fshatin Godvi të Bulqizës deri në vitin 2003, kohë kur banorët e fshatit ndërtuan vetë një godinë të re. Por edhe këto ambiente janë aktualisht jashtë funksionit.

Banorët e Godvisë tregojnë për Report Tv se jo vetëm nuk është kryer asnjë investim prej dekadash por së fundmi është larguar edhe infermieri i fshatit.

Të moshuarit ankohen se për të marrë një shërbim elementar siç është matja e tensionit detyrohen të udhëtojnë 11 kilometra drejt spitalit të Bulqizës.

"Tek ne mungon shërbimi shëndetësor prej më shumë se 6 muajsh. Ne jemi pleq të vjetër, nuk kemi ku të masim tensionin. Duam që të vijë një infermiere që ta kemi afër e të na shërbejë", tha Nezie Seiti. Ndërsa Shahie Fiku, një tjetër banor e fshatit shprehet " 22 më shkon tensioni, s'kam ku ta mas nuk shkoj dot ne Zerqan se jam plakë e vjetër nuk mund të udhëtoj".

Për këtë problematikë është në dijeni Drejtori i Shëndetësisë në Diber, Flamur Meta dhe kryebashkiaku i Bulqizës, Lefter Alla.

"Kam vendosur në dijeni drejtorin e shëndetit publik dhe kryetarin e bashkisë ku u bë projekt/buxheti i vitit 2022, por ata s’po marrin asnjë masë për ti ardhur në ndihmë komunitetit", tha Qemal Jangulli, Kryeplak i fshatit.

Me bujqësi e blegtori të zhvilluar, Godvia me 200 banorë është një ndër fshatrat më të populluar në Bulqizë.

J.GJ./Sh.Sh/Shqiptarja.com

TAG:
• Godvia bulqize
• Diber
• bulqizë
• Lefter Alla