Bumçi merr urimet e para në
detyrë nga katër ambasadorë

TIRANË - Ministri i Punëve të Jashtme, Aldo Bumçi ka pritur gjatë këtyre dy ditëve, nё takime kortezie, disa ambasadorë të huaj, që e kanë uruar për detyrën e re të marrë javën e kaluar pas largimit të LSI nga koalicioni qeveritar.

Ministri i Punëve të Jashtme, Aldo Bumçi priti sot Ambasadorin e Republikës së Turqisë nё Tiranë, z. Hasan S. Aşan,  Ambasadorin e Mbretërisë së Spanjës në Tiranë, z. Rafael Tormo Pérez,  ambasadorin e Bullgarisë në Tiranë, z. Dimitar Arnaudov, ambasadorin e Bullgarisë në Tiranë, z. Dimitar Arnaudov ndërsa dje u takua me ambasadoren e Republikës Federale të Gjermanisë, në Tiranë, znj. Carola Müller –Holtkemper. Ata i kanë uruar për detyrën dhe kanë shprehur bindjen se marrëdhëniet do të vazhdojnë të jenë shumëdimensional. Gjithashtu ambasadorët kanë siguruar mbështetjen e shteteve që përfaqësojnë në avancimin e axhendës evropiane të Shqipërisë.

Nga ana e tij Ministri Bumçi vuri në dukje potencialet e mëdha për zhvillimin e mëtejshëm tё këtyre marrëdhënieve, veçanërisht në fushat ekonomike dhe tregtare, duke evidentuar klimën pozitive të krijuar në vend për tërheqjen e investimeve të huaja.

Në takimin me ambasadorin e Mbretërisë së Spanjës në Tiranë, z. Rafael Tormo Pérez, bashkëbiseduesit u ndalën veçanërisht në Bashkimin për Mesdheun dhe Aleancën e Civilizimeve, si dhe shprehën vullnetin e përbashkët për të forcuar më tej këtë bashkëpunim në të ardhmen.

Në takimin e zhvilluar dje me  Ambasadoren e Republikës Federale të Gjermanisë, në Tiranë, znj. Carola Müller –Holtkemper ministri Bumçi e cilësoi Gjermaninë si një partner strategjik politik dhe ekonomik të Shqipërisë, dhe një mbështetës të fuqishëm të progresit që Shqipëria ka arritur vitet e fundit.  Ai garantoi se Shqipëria do të kryejë të gjitha reformat e nevojshme, përfshirë organizimin e zgjedhjeve të ardhshme parlamentare në përputhje me standardet më të mira ndërkombëtare.

Redaksia online
(ar.sh/sg/shqiptarja.com)

/Shqiptarja.com