Një sasi tritoli është hedhur mbrëmjen e kësaj të mërkure pranë një biznesi mobilerie në qytetin e Burrelit. Nga shpërthimi është dëmtuar një automjet tip "Land Rover" i parkuar pranë mobilerisë, ndërsa nuk raportohet për persona të lënduar. 

Policia bën të ditur se automjeti është në pronësi të F.B rreth 50 vjeç, banues në Burrel. Vijojnë hetimet për zbardhjen e shkaqeve të kësaj ngjarje dhe identifikimin e personave përgjegjës. 

Njoftimi i policisë:

Informacion paraprak

Rreth orës 21.00, Policia e Komisariatit Mat, ka marrë njoftim se në hyrje të qytetit të Burrelit, pranë një mjeti është hedhur dhe ka shpërthyer një sasi lëndë plasëse.

Menjëherë kanë shkuar shërbimet e policisë dhe grupi hetimor në vendin e ngjarjes ku kanë konstatuar se në oborrin pranë një mobilerie, ka qenë i parkuar një automjet tip "Land Rover", ku pranë këtij automjeti dyshohet është hedhur dhe ka shpërthyer një sasi lënde plasëse, duke u dëmtuar pjesërisht.

Automjeti është në pronësi të shtetasit F.B, rreth 50 vjeç, banues në Burrel.

Grupi hetimor ndodhet në vendin e ngjarjes ku po vijojnë hetimet për zbardhjen e rrethanave të ngjarjes.
burrel

Redaksia Online
l.q/Shqiptarja.com