“Kam menduar disa herë të vija, duke qenë se jam edhe vetë i apasionuar me historinë. Prej vitesh dëshiroja të udhëtoja në jug të Italisë ku jetojnë shumë arbëreshë. Ishte një mundësi që nuk mund ta humbisja”- ka thënë Cana.
Ish-kapiteni i Kombëtares nuk i fshehu emocionet dhe vlerësimin për komunitetin që ka ruajtur traditat dhe gjuhën e paraardhësve prej afro 6 shekujsh. “Është diçka e jashtëzakonshme, që pas gati gjashtë shekujsh ka ende njerëz që e kanë ruajtur, traditën, kulturën dhe gjuhën në një vend që nuk është i yni.
Është e jashtëzakonshme. Është e rëndësishme që edhe t’i tregojmë Italisë se nuk kemi ardhur vetëm në vitet ’90, por jemi këtu prej lashtësisë. Jam vërtetë i lumtur që ndodhem këtu”- ka shtuar ish-kapiteni kuqezi.
Lorik Cana e cilësoi vizitën në Horën e arbëreshëve dhe takimin me këtë komunitet si një mundësi që nuk do ta humbiste për asgjë në botë. “Sigurisht që rezultati është i rëndësishëm, por emocionet që po ndajmë me bashkëkombësit tanë nuk ka çmim”- ka theksuar Cana.
Redaksia Online
K.M/Shqiptarja.com