Çelet Qendra e Inovacionit, Sigurisë dhe Mbrojtjes, Rama: Brenda 2030 eksporte ushtarake 'Made in Albania'

Gjatë aktivitetit të organizuar me rasti e çeljes së Qendrës së re të Inovacionit, Sigurisë dhe Mbrojtjes Kryeministri Edi Rama u ndal  edhe tek dronët Bayraktar me të cilët është pajisur Forca Ajrore.

"Ne do të mund t’i bëjmë, më në fund, pa njerëz në terren, por me sy nga lart falë dronëve Bayyraktar”.

“Falë koordinimit që po bën Ministria e Mbrojtjes dhe disponimit të Shtabit të Përgjithshëm, ku institucionet që kanë lidhje të drejtpërdrejtë me inspektimet më të rëndësishme në territor janë vënë në kontakt dhe po përgatisin protokollet e punës do të kemi supervizim të vazhdueshëm dhe të pagabueshëm për territorin në aspektin e mbetjeve, në aspektin e ujërave, në aspektin e tokës bujqësore, të parcelave të punuara, të parcelave të papunuara, në aspektin e ndërtimeve, në aspektin për ligjin në ndërtim dhe ndërtimet pa leje dhe kështu një tjetër pjesë e llumit të korrupsionit, që është produkt i shkallës së modernizimit, do të largohet nga jeta e përditshme institucionale dhe nga jeta e përditshme ekonomike dhe sociale e vendit, siç është larguar një pjesë e madhe e atij llumi falë gjithë shërbimeve që prej disa vitesh ofrohen sot online përmes portalit “e-Albania””, u shpreh Kryeministri Rama.

Gjatë ceremonisë së hapjes së Qendrës së re të Inovacionit, Sigurisë dhe Mbrojtjes Ministri i Mbrojtjes Niko Peleshi e cilësoi këtë si një hapje të një faqeje të re në Forcat e Armatosura dhe Ministrinë e Mbrojtjes.

“Është një faqe modernizimi , është një kalim në një fazë të re të zhvillimit të Shqipërisë që po i bashkohemi edhe ne. Është mishërim i vizionit të Kryeministrit Rama për futjen  e zhvillimeve në Shqipëri në lëvizjen për inovacion”, u shpreh ministri Peleshi.

Sipas ministrit Pekeshi, “Një vend me zhvillim si Shqipëria ka nevojë për të kapërcyer dhe për të rritur ritmin me ndihmën e teknologjive të reja, me ndihmën e fuqisë intelektuale të kombit shqiptar. Ndaj ne sot jemi krenarë që i bashkohemi kësaj lëvizje dhe premtojmë që shumë shpejt do të japim produkett e para inovative që do të jenë edhe model frymëzues besoj për të rinjtë shqiptarë që na janë bashkuar në Forcat e Armatosura, por edhe për të rinjtë e tjetër që të kuptojnë që e ardhmja mund të ndërtohet këtu”. Ministri i Mbrojtjes tha se kjo qendër është pjesë e rrjetit të qendrave të ekselencës së NATO-s, duke qenë se Shqipëria është vend anëtar. “Qendrat e ekselencës së NATO-s, si anëtarë të Aleancës janë qendrat tona të ekselencës. Jemi pjesë e një network-u, që ndërveprojmë, rrisim kapacitetet tona të trajnimit, jemi në konkakt me të rejat e fundit të Inteligjencës Artificiale, teknologjive të reja, të cilat kanë për qëllim të na ndihmojnë në rritjen e kapaciteteve tona të sigurisë dhe mbrojtjes, të ndërtojmë më shumë fuqi mbrojtëse me më pak burime”, u shpreh Ministri Peleshi.

Sipas ministrit Peleshi, në këtë qendër trajnohet modeli shqiptar i Inteligjencës Artificiale, duke përdorur dy teknologjitë; dy satelitët Albania 1 dhe Albania 2 dhe flotiljen e dronëve Bayraktar, imazhet e të cilëve analizohen sipas interesave të sektorëve.

Pagat për Forcat e Armatosura do të rriten çdo vit, tha kryeministri Edi Rama gjatë fjalës së tij në ceremoninë e inaugurimit të qendrës së re të Inovacionit, Sigurisë e Mbrojtjes.

“Për herë të parë në trendin historik pagat e Forcave tona të Armatosura rriten çdo vit, sikundër e kemi premtuar dhe do të rriten përsëri këtë vit në mënyrë përsëri të ndjeshme, sepse qëllimi ynë nuk është thjeshtë, dhe kjo është një pjesë e tij pa diskutim që ne të kemi një trupë ushtarake të financuar dhe të paguar individualisht për çdo efektiv të saj në mesataren e vendeve NATO-s, gjë që jemi duke e synuar çdo vit dhe praktikisht sot, ndryshe nga jo shumë vite më parë, ne kemi një ushtri që në aspektin e pagave është në nivelin A të rajonit”, u shpreh Rama.

Kjo, vijoi Rama, është një mbështetje për atë që duam të kemi nesër.

“Dhe patjetër që duke parë këtë bërthamë kaq premtuese, vjen natyrshëm edhe nevoja për të rritur motivimin financiar të studentëve të Akademisë së Mbrojtjes, për të rritur motivimin financiar të nxënësve që e shikojnë mundësinë e një perspektivë në Forcat tona të Armatosura, dhe për më tepër për të gjithë ata studentë, qofshin në sistemin e mbrojtës, apo qofshin në sistemin e përgjithshëm universitar, që kanë diçka për t’i dhënë këtij vendi në këtë aspekt dhe që do t’i referohen kësaj qendre inovacioni së bashku me Agjencinë e Inovacionit të Ekselencës që do të jetë pranë saj, ne natyrshëm duhet të marrim masat tona edhe për motivimin  financiar të tyre dhe nëse për ushtrinë në tërësi ky është një  investim, për çka ushtria i garanton vendit në të përditshmen e vet për këtë pjesë të sistemit që ka të bëjë me inovacionin, ky është një investim, i cili do të mjaftonte një nga shumë e shumë  përpjekjet që do të bëhen këtu për të pasur një sukses përtej kufijve të Shqipërisë për të mbuluar të gjithë shpenzimet tona”, u shpreh Kryeministri.

“E them këtë jo për të qeshur, por për të buzëqeshur dhe nga ana tjetër unë e di që ministri nuk është nga Gjirokastra, është nga Korça, por nuk është se janë shumë larg me njëra-tjetrën Korça me Gjirokastrën kur vjen puna te nikoqirllëku në raport me financat dhe patjetër që do ta sigurojë anën e ministrisë dhe të shtetit që të gjithë ata që do të marrin këto motivimet financiare të jenë në një kontratë që në rast të një suksesi të pritshëm dhe të befasishëm të mos largohen duke i marrë të gjitha për vete”, përfundoi Rama.

Gjatë fjalës së tij në Qendrën e re të Inovacionit, Sigurisë dhe Mbrojtjes kryeministri Edi Rama tha se po përgatisin një platformë të re të zhvillimit të industrisë ushtarake.

“Po përgatisim platformën e re të zhvillimit të industrisë ushtarake. Një platformë që sot është koha për ta përfshirë në të gjithë trupin legjislativ të republikës së Shqipërisë dhe pastaj mbi të për të nisur një valë investimesh në industrinë e mbrojtjes”.

Kreu i qeverisë theksoi ambicien që brenda 2030 të kemi eksporte ushtarake të markës made in Albania.

“Ambicie që brenda 2030 të kemi eksporte ushtarake të markës made in Albania. Ushtria jonë të fillojë të pajiset edhe me mjete ushtarake të markës made in Albania. Jemi vend i vogël por kemi aleatë të mëdhenj", tha Rama.