Akuzat për Edmond Begon/ Gjiknuri-PD: Procedurë transparente, ish-ministri demokrat firmosi leje në 2009

TIRANE-Partia Demokratike ka vijuar akuzat edhe ditën e sotme ndaj qeverisë socialiste për favorizim në tendera dhe leje minerare të biznesmenit Edmond Bego, i cili u ndalua pak ditë më parë në Greqi, por më pas u la i lirë pas verifikimeve. Sipas deputetit të PD, Ervin Salianji, përpos Ballës, Begon e ka favorizuar edhe ministri Damian Gjiknuri. Ai akuzoi se Gjiknuri ka firmosur leje minerare për biznesmenin Edmond Bego, ndërsa prokuroria nuk po e heton.

Damian Gjiknuri, 3 vjet më parë, atëherë kur trafikanti i drogës Bega dhe politikani Balla u bënë miq familjarë, ka firmosur leje minerare pa garë për Edmond Begon. Prokuroria sërish hesht si në rastin e Agron Xhafajt, njofton se ka nisur hetim pasuror, por jo sipas ligjit. Balla hesht dhe Rama hesht që të mbulojnë përfitimet e trafikantit të drogës. Dokumentet implikojnë edhe Gjiknurin për lejet minerare që ka firmosur. Ligji skualifikon në garën për tenderat të dënuarit me formë të prerë për pjesëmarrje në organizata kriminale. Prokuroria i shërben krimit, nuk po heton nëse ka qenë Balla sekser. Për politikanë si Balla dhe Gjiknuri drejtësia mund të vonojë por nuk do të harrojë.

 Ervin Salianji, deputet i PD-së

DEKLARATA E PLOTË E ERVIN SALIANJIT
Edmond Bego, miku trafikant droge me 5 emra i Taulant Ballës, nuk ka përfituar vetëm para publike në kundërshtim me ligjin – 10 milionë euro dhe 6.4 miliardë lekë në 7 muajt e fundit, por ka përfituar edhe pasuri publike.

Për shumëfishimin e pasurisë së mikut trafikant droge të Taulant Ballës janë përfshirë edhe ministrat e Edi Ramës.

Damian Gjiknuri, 3 vjet më parë, atëherë kur trafikanti i drogës Bega dhe politikani Balla u bënë miq familjarë, ka firmosur leje minerare pa garë për Edmond Begon.

Leja minerare është dhënë në zonën elektorale të Taulant Ballës, në Elbasan, njësoj si shumica e punëve të tjera publike.

Sipas lejes që ka firmosur Damian Gjiknuri, miku trafikant droge i Taulant Ballës, ka të drejtë të shfrytëzojë për 25 vjet pasuritë natyrore në interes të biznesit të tij të ndërtimit, i cili duhet të ishte tani nën sekuestro nga prokuroria.

Prokuroria sërish hesht dhe bën të njëjtën lojë si në rastin e Agron Xhafës.

Njoftoi jozyrtarisht se ka nisur verifikim pasuror, po jo hetim, siç ia kërkon ligji, me shpresën se gjithçka do të harrohet, kur shërbëtorët e mafias dhe të krimit në pushtet të mbyllin dosjen.

Taulant Balla hesht, edhe Edi Rama hesht, që të mbulojnë me harresë përfitimet skandaloze dhe të paligjshme të trafikantit të drogës, pasi ai u bë mik familje me Taulant Ballën dhe që tani implikojnë edhe ministrin Damian Gjiknuri.

Njësoj si për lejen minerare të firmosur nga Damian Gjiknuri, PD ka sjellë fakte dhe dokumenta që provojnë se miku trafikant i Taulant Ballës e ka shumëfishuar pasurinë duke shkelur ligjin për prokurimin publik.

Ligji skualifikon nga gara çdo ofertues, të dënuar me vendim gjyqësor të formës së prerë për pjesëmarrje në organizata kriminale, si Edmond Bego.

Prokuroria, e cila po provon çdo ditë se i shërben krimit të organizuar të lidhur me pushtetin, po ndjek skenarin e Edi Ramës, duke mos nisur hetimet për Taulant Ballën per te provuar nëse ai ka qenë sekseri mes qeverisë dhe mikut trafikant, si dhe për këdo që ka shkelur ligjin duke i dhënë anëtarit të bandës kriminale të Lushnjës miliona euro punë publike dhe leje për shfrytëzim të pasurisë publike.

Për pasuritë e trafikantëve si Bega dhe politikanëve si Balla e Gjiknuri, drejtësia mund të vonojë, por me ligjin tonë antimafia, do të bëjmë që drejtësia të mos harrojë.

Dokumentet e publikuara nga deputeti i PD, Ervin Salianji

Rendit zhvillimet sipas orarit:

Të Fundit Të Parat

//Shqiptarja.com

TAG:
• taulant balla
• ervin salianji
• damian gjiknuri
• edmond bego