CEZ: Kontroll faturuesve
për ankesat e qytetarëve

TIRANE- CEZ shpërndarje nis projektin e kontrollit të faturuesve të vet. Pas shqetësimeve të herëpashershme në media dhe në opinionin publik për faturimin e energjisë elektrike, CEZ duke filluar nga kjo javë e deri në fund të muajit shkurt, do të kontrollojë mbi 100 faturistë të kompanisë së shpërndarjes së energjisë elektrike, të cilët do të shoqërohen në terren nga një menaxher.

“Menaxheri do të mbajë shënim mbi procesin e punës duke krahasuar në fund të dhënat me ato të lexuesit. Në fund të muajit shkurt, do të bëhet një analizë e përgjithshme mbi situatën, duke u bazuar mbi shënimet e menaxherëve përkatës. Kompania CEZ Shperndarje ështe e vendosur në masat që do të merren deri dhe në zëvendësimin e punonjësve që rezultojnë të jenë problematikë dhe të korruptuar me punonjës të rinj. Ky projekt gjithashtu ndihmon në kontrollin mbi saktësinë e PDA-së që përdoret për leximin e matësave të energjisë elektrike” thuhet në njoftimin e CEZ.

Rreth 40% e ankesave që vijnë nga abonentët janë ankesa që kanë të bëjnë me pretendime për pasaktësi në leximin e matësave. Në rreth 70% të ankesave për mbifaturim vërtetohet që pretendimi i klientit nuk është i saktë. 50% e ankesave për faturim të pretenduara gabim, janë për periudhën 2007 dhe 2008. CEZ Shpërndarje është plotësisht e angazhuar për t’ju ofruar klientëve të saj një shërbim sa më cilësor dhe të drejtë, thuhet në deklaratën për shtyp të CEZ.
(sg/shqiptarja.com)