Ngjyrat kanë pushtuar sheshin Nënë Tereza. "Colour Day Festival " vjen për herë të parë në Shqipëri, një festë, kryefjala e së cilës janë ngjyrat dhe muzika. Këngëtarë dhe DJ të shumtë kanë ndezur atmosferën gjatë kohës që publiku është mbuluar nga pluhurat shumëngjyrësh.
Festivali që të fton të ngjyrosësh ëndrrat është pritur me padurim nga të rinjtë, disa prej të cilëve kanë ardhur enkas nga Kosova për këtë eveniment. Dj të famshëm si Dj Sardi, Dj Abel, Dj Olti, këngëtarë të mëdhenj si: Elvana Gjata, Alban Skënderaj Capital T, Lumi B, Majk, Gjergj Kacinari etj, kanë ndezur skenën duke bërë publikun të kërcejë nën ritmet e muzikës së lartë.
Nga ora 12 e paradites deri në mesnatë festa dhe ngjyrat nuk kanë ndalur në asnjë moment, duke e bërë atmosferën më shumëngjyrëshe se kurrë. Dj Tujamo ishte dhe surpriza e mbrëmjes për të cilin, publiku kishte orë që priste.
