Shoqata e Arbitrave të Shqipërisë ka reaguar duke dënuar sipas saj dhunën ndaj arbitrit në ndeshjen Flamurtari-Vllaznia para dy ditësh. Shoqata kërkon ndëshkim maksimal per dhunuesit dhe organizatorët. Por i çuditshëm është fakti që kjo shoqatë zgjedh që të reagojë serish përmes faqes së FSHF, edhe pse më parë ka deklaruar se është e pavarur nga Federata Shqiptare e Futbollit. Përsa i përket ndeshjes në Vlorë, gjyqtari Ilir Tartari pretendon se u dhunua, ndërsa drejtuesit e ekipit të Flamurtarit e mohojnë duke e cilësuar si inskenim.

Dhuna e ushtruar në stadiumin e Vlorës në përfundim të ndeshjes Flamurtari-Vllaznia, ku arbitri i ndeshjes dhe zyrtarët janë goditur nga persona pranë Presidentit të klubit dhe nën shoqërinë e tij, për fat të keq rregjistron një tjetër akt shumë të dënueshëm, antisportiv karshi arbitrave të futbollit.

Shoqata e Arbitrave të Shqipërisë e denoncon me forcë këtë ngjarje të shëmtuar dhe shumë të rëndë, e cila vjen pas një presioni në rritje javë pas jave karshi arbitrave në fushat e futbollit, dhe jo vetëm.

Ne kërkojmë zbardhjen e plotë të ngjarjes në Vlorë nga ana e Autoriteteve përkatëse për të identifikuar dhe shpënë përpara përgjegjësisë personat që goditën arbitrin Ilir Tartari dhe zyrtarët e ndeshjes. Këto akte aspak civile dhe tepër të dënueshme kërkojnë ndëshkim, jo vetëm nga drejtësia sportive. Asnjë gjë nuk mund të përligjë kurrsesi përdorimin e dhunës karshi arbitrave e kujtdo në një ambjent sportiv.

Presioni i vazhdueshëm psikologjik karshi arbitrave këtë radhë në Vlorë degradoi në dhunë fizike dhe ky rast ekstrem kërkon ndëshkim maksimal për ideatorët dhe autorët e tyre.

Shoqata e Arbitrave të Shqipërisë