Dade: Nevojë fuqizimi ekonomik i grave

Deputetet Arta Dade dhe Monika Kryemadhi gjate punimeve ne Konferencen e organizuar nga OSBE, ne Serbi
TIRANË, 3 Mars/ATSH/.- Kryetarja e komisionit të jashtëm parlamentar, Arta Dade, në fjalën e mbajtur në
konferencën e organizuar nga OSBE/ODIHR në bashkëpunim me Parlamentin e Serbisë, vlerësoi nevojën e fuqizimit ekonomik te grave.
Gjatë seancës kushtuar grave në udhëheqje, ku ishin të pranishëm përfaqësues të Forumit Global të Grave në Parlament, znj. Dade tha se fuqizimi i grave në udhëheqje ka ndikim në të gjitha sferat e veprimtarisë shoqërore, ndërsa shprehu nevojën në kthimin e vëmendjes te fuqizimi ekonomik i grave e vajzave, te punësimi, shkollimi e kualifikimi në fusha ku ato janë të marxhinalizuara, si IT, bujqësi, biznes, sektori bankar, etj.
Dade tha se gratë parlamentare, përpos përmirësimit të legjislacionit për krijimin e hapësirave për inkurajimin e gruas në biznes, por dhe përmes strukturave ekzekutive, duhet të tregojnë kujdes që kjo çështje të jetë në vëmendje për të krijuar mundësi punësimi, në përputhje me legjislacionin në fuqi të grave e vajzave, si në sektorin publik edhe në sektorin privat përmes partneritetit shtet-privat.
Dade sugjeroi që takimi i radhës në Tiranë të diskutojë për instrumentet efektivë të fuqizimit të grave e të bashkëpunimit rajonal për këtë çështje, në një rajon që sheh nga e ardhmja e përbashkët e për të ndarë përvojat pozitive të funksionimit të kuotave gjinore të përfaqësimit e rritjen e tyre. /a.s/ /a.ke/
 

TAG:
• OSBE