Pas bllokimit të produkteve shqiptare në kufirin me Maqedoninë, me urdhër të ministrit të Bujqësisë, Edmond Panariti, janë kryer analiza për të verifikuar nivelin e pranisë së pesticideve në perimet të cilat prodhohen në serat e zonës së Lushnjes.
 
Në një reagim për mediat, Drejtori i Përgjithshëm i ISUV, Taulant Kalo ka bërë publike rezultatet e analizave të kryera mbi praninë e pesticideve në perimet shqiptare, kryesisht domate dhe kastaraveca nga zona e Lushnjes.
 
Sipas tij, analizat tregojnë një nivel të papërfillshëm të pranisë së pesticideve.
 
“Këto analizat janë kryer paralelisht në Institutin e Sigurisë Ushqimore dhe Veterinarisë (ISUV) në vend dhe në një institut reference të akredituar dhe të njohur ndërkombëtarisht në Itali (Instituto Zooprofillattico Sperimentale dell’Abruzzo e del Molise “Giuseppe Caporale”), rezultatet e të cilave tregojnë se masa e pesticideve të gjetura në perimet e fermerëve shqiptarë është e papërfillshme”, u shpreh Kalo.
 
Ai tha se "ISUV ka marrë për analizim mbi 360 lloje pesticidesh dhe kampionet e ekzaminuara kanë rezultuar me praninë e këtyre lëndëve nën nivelin maksimal të lejuar në nivel ndërkombëtar".
 
Kjo është gjithashtu një dëshmi më shumë për sigurinë ushqimore të konsumatorit tonë, larg spekulimeve dashakeqe.

Redaksia Online
Shqiptarja.com